Shakhtar-in Solomon man an phut

Ukrainian club Shakhtar Donetsk chuan Tottenham Hotspur-in an player Manor Solomon an lakluh chungchangah zângnadawmna an phut a, London club lakah euro maktaduai 6.5 an beisei - club pahnih an indawr mek.

Israel international Solomon hian season hmasa kha Fulham-ah loan-in a khel a, Premier League club-ah season khat a khelh hnuin Spurs hian free transfer-in nipuiah khan an la lut.

Ukraine-a indona avangin FIFA chuan Ukrainian player ni lo zawngte chu an club khelhnaa an contract titawp lailawk turin zalenna a pe a, Solomon hian hei hi remchangah lain Fulham a zawm.

Fulham-a a loan hun zoin, duh lam pan tura zalenna neiah inngaiin Spurs a pan a, London club hian kum nga chhung atan contract an ziahpui.

Mahse, FIFA-in phalna pe ngawt mah se, Solomon-a original contract chu December, 2023-a tawp chauh tur a ni a, hei hi Shakhtar chuan hre ranin Spurs lakah hian an player man hi an phut ta a ni.

Shakhtar CEO Sergei Palkin chuan June thla khan an player lakluh tum club ho a lo vau lawk tawh a, free transfer-a an player contract nei lai lakluh tum an awm chuan dan anga hma an lak tur thu a lo sawi tawh.

Spurs chuan season dangah Solomon an hralh a nih chuan a hralhna man insem mai turin Shakhtar hi an lo dawr a, he thu buatsaih a nih lai hian club pahnih inbiakna a kal mek.