Kane chelh duh Spurs-in Bayern an hnar leh ta!

Tottenham Hotspur chuan awlsam taka an striker chhuanvawr Harry Kane chhuahtir an tum lo tih an pholang leh ta a, a vawi thum nan Bayern Munich dawrna chu an hnar!

Bayern hian Kane lakluh tumin a hmain vawi hnih an lo dawr tawh a, tun ṭumah hian pound maktaduai 86-in an dawr nia sawi a ni. Mahse, Spurs hian inngaihtuah buai loin German champion dawrna hi an lo hnar nghal.

Spurs hian kum 2021 khan Manchester City-in £127mtd-a Kane lakluh an tumna chu an lo hnar tawh a, tun ṭumah pawh hian an striker hi a chhuak dawn a nih chuan £100mtd aia tlawma chhuahtir chu an tum lo niin a lang.

Kane hian nakkumah London club-a a contract a hmang zo tawh dawn a, a duh lam pan turin zalenna a nei ang - Spurs tan chhuah duh striker chelh reng ai chuan man a neih theih laia hralh a finthlak mai thei.

Bayern an buai

German champion hian Kane lakluh an tum vawi thumnaah hian an hlawhchham leh a nih chuan chawlhsan an tum tawh nia sawi a ni a, chutihrual chuan transfer bazar khar nan kar thum vel chiah hun a awm tawh avangin Bayern tan player dang rim thar turin hun a tam tawk lo mai thei.

Spurs chairman Daniel Levy-a duhthlanna hmasa ber chu Kane chelh a ni a, mahse, English striker ber hian chhuah a duh miau avangin season thara a thlawna chân ai chuan tuna hralh hi Spurs tan a fuh zawk.

Mahse, London club hian kum khat chauh contract nei tawh mah se, tlawm taka chhuahtir an la ui tlat - kar hmasa khan Levy hi Bayern thuneitute nen an inhmu a, mahse, Kane-a man chungchangah an inrem thei lo.

German chanchinbu lar Bild-in a tarlan dan chuan Kane tak hi chuan Bayern pan hi a hreh lo a, German club nen hian a hlawh tur leh contract chungchangah pawh an inrem fel tawh - a man chiah buaina a ni mek.

Lewy thlaktu

Bayern hian season hmasa ṭan dawn khan Barcelona lakah striker chhuanvawr Robert Lewandowski an chân a, Liverpool aṭangin Sadio Mane la lut mah se Senegalese forward nen an inrem lo - Saudi lamah Al Nassr a zawm tawh.

Hei vang hian Bayern boss Thomas Tuchel chuan number 9 striker a duh a, Kane lam an hawi chat - mahse, football khawvela dawr har ber pawl Levy an dawr a ṭul a, an la inrem thei lo.

Spurs lam hian a theih phawt chuan Kane chelh hi an duhthlanna hmasa a ni - English striker hian London club-ah kar khatah £200,000 a hlawh mek a, £400,000 hlawh turin contract thar ziak turin an thlem nia sawi a ni.

Mahse, Kane hian champion a duh ve tawh a, Spurs-ah chuan a beisei 'champion' hi an thleng thei dawn lo niah a ngai - Bayern a zawm chuan Bundesliga chu a chiangsa deuhthawa sawi ngam a ni dawn a, Kane tan champion a sawi ngam ang.

Kane sulhnu

English striker Kane hian Spurs tan match 435 khel tawhin, goal 280 zet a khungsak a, season hman zawh takah pawh khan match 49-ah goal 32 ngawt a la khung - a record hi a ropui takzet.

England tan pawh vawi 84 inlan tawhin, goal 58 zet a khungsak a, mahse, kum 30 mi striker hian a career-ah champion nomawi chawi a la nei lo a, champion nawmzia a la tem lo!

Hei vang hian Kane-a'n champion theihna tur club pan a duh a, a hma hun chinfel vat a ngai - Bayern hian August 12 zanah German Super Cup match-ah RB Leipzig hmachhawnin season an ṭan dawn.

Tottenham hian August 13 zanah Brentford lenchilhin season bul an ṭan dawn bawk - September 1 thleng transfer hawn a ni a, mahse, Kane, Spurs leh Bayern tan season ṭan hmaa buaina chinfel chu duhthusam a ni.