Group of Death - Vawiinah bukin an awm dawn; Police dal theitu tur Project Veng

GIG Motors I Day Football 2023-ah champion lai Mizoram Police chu tla thei dinhmunah an ding. Lalbiaksanga Colney hote hian vawiin chawhma dar 11:00 hian MSSC Ground, Muallungthuah MPL kai thar Project Veng FC an hmachhawn dawn.

Tualchhung football-a tawnhriat nei ṭha Police player-te leh enghelh vak la nei lo Project Veng player-te inkhel tur hi a hmuhnawm dawn. Result nghawng a lian a, hei hian inkhel hmuhnawmna a belhchhah ang.

Sawmfela buk a rit

Mizo striker Malsawmfela buk a rit a, a pumrua ang zawnga thlir loin an khelh dan aṭanga thlir pawhin a buk a la rit tho. Sawmfela'n match hnih an khelh tawhah player 'special' a ni tih a lantir a, a khelhpuite a hriatchian ang bawkin a khelhpuiten an hrechiang.

Sawmfela hian goal khat chauh a la khung a, chu pawh penalty a ni. Mahse, Police goal sarih khungah a inrawlh vek tih theih a ni. Tun ṭum inelnaah Lalbiakhlua'n (Biaktea) a tlan chakzia a la lantir reng thei a, captain Lalfakzuala pawh goal hmaah a la hriam hle.

Tlarhnung hi...

Police-in Chhinga Veng lakah goal li an chhuah a, tawnhriat nei ṭha ber tura ngaih Lalhmunmawia'n penalty vawi hnih ngawt a chawi. BS-a'n Project Veng laka hnehna chan a tum a nih chuan tlarhnung a rem phui a ṭul dawn.

Police hian tun inelnaah goal sarih khung mah se goal sarih tho an chhuah a, match hnih chauh an la khelh avangin an goal chhuah zat hi a mak zawk. Ahmuntea leh tlarhnunga a dinpuite chauh ni loin midfield lam aṭanga thlawptu H. Lalbiakthanga leh R. Malsawmtluanga te pawh an insiamṭhat tel a ṭul ang.

Project Veng hun!

Project Vengin chak an la nei lo a, mahse an result ni loin an match khelh tawh pahnih thlir chuan zuam theih an ni lo. Kolasib hian player langsar kawl lo mah se eng team pawh hneh thei an ni.

Head coach R. Lalrammawia (Patea) leh coach R. Lalruatfela te hoin training an nei ṭha tih a hriat a, player an inrem ṭha ṭhin hle. Chutihrualin Project Veng player-te tawnhriat neih tlemna a lang a, tihsual an nei leh ṭhin. Police lakah phei chuan fimkhur lehzual a ṭul ang.

Police tlarhnung a pawh avangin Project attacker MS Dawngzuala leh Lalfamkima te an hmuhnawm leh viau tura ngaih a ni. Kolasib club tan semifinal luh theihna kawng inhawng zau tawh lo mah se an chance tlem neih hi bawhpelh an duh lo ang. Nikum Kolasib I Day Football-a champion Project Veng tan match thuma point hmuh miah loh hi a zahthlak!