I Day Football knockout a inṭan ta

GIG Motors I Day Football 2023 group stage chu vawiinah khelh zawh ni dawn chauh mah se chawhnu dar 1:30-a Chawnpui FC leh Chhinga Veng FC inkhel tur hi chu quarterfinal anga ngaih theih a ni.

MSSC Ground, Muallungthuah Lalsangzuala Hmar-in a club hlui Chawnpui a hmachhawn dawn a, coach rorum hi Chhingcows boss a nih tawh avangin Chawnpui par thliah a hreh lo ang.

Quarterfinal chu

Chawnpui hian hnehna an chang a nih chuan semifinal an lut thei a, Chhinga Veng hi tla thei an nih rualin point an hmuh hrim hrim chuan semifinal luh nan a tawk.

Group match hnuhnung ber ni mah se a hlut dan hi quarterfinal angah a ngaih theih. Chawnpui FC-in attacking football an khelh ngei a ṭul a, goal nawr turin player ṭha an nei bawk.

Tlarhmaah David Lalchhuan-awma leh Lalrosanga te an awm a, Mizo forward ṭha thlawp tur hian Vanlalthanga leh Vanlalremkima (Tetea) te an awm. Project Veng laka goal khungtu Peter Lalrinhlua leh a siamsaktu Malsawmzela (Valpuia) te hming lam hmaih a thiang lo bawk.

Chhinga Veng thar

Coach Sanga hnuaiah Chhinga Veng an indinthar a, tlarhnungah player lian ṭha awmin tlarhma lamah player che rang (pa lian lo) an awm thung.

MS Dawngliana'n hmun pawimawh a chang a, Chhinga Veng captain hian goal nga a khung tawh. Chawnpui lakah pawh Dawngtea hi ven a ṭul dawn; chutihrualin Suanngaihmuana, Isaak Malsawmkima, Isac Zomuanpuia leh K. Lalruatdika te an awm bawk avangin mimal ven theih a ni dawn lo.

Chhingcows hi team ṭha zawka ngaih ni mah se Mizoram Police lakah an tlarhnung a phui bik lo. Hei tak hi Chawnpui FC fuih phurtu tur a ni a, MPL champion lai an ni tih hriat a ṭha bawk.