Chanmari FC-in an theihna an lantir ta

GIG Motors I Day Football-ah Chanmari FC chuan nimin khan Electric Veng FC chu 4-1 in an sawp. K. Malsawmkima hote hian point ruk an hmu a, group A-ah pahnihna niin semifinal an lut.

MSSC Ground, Muallungthua inkhelah Chanmari tan Vincent Lalduhawma'n goal hnih a khung a, Felix Lalruatsanga leh Laltlanzova ten goal khat ve ve an khung bawk.

Ruah sur hnuaiah

MPL club-ten khawchhe hnuaiah Muallungthu an pan a, nilenga ruah a sur avangin inkhelh a harsa. Chutihrualin club tin harsatna tawh a inang vek a, chhuanlam siam a thiang lo.

Coach Mala'n bul ṭantu zingah CYMA Football 2023-a hming rawn chher Vincent-a a rawn dah a, Tlangnuam final luh theih nana goal sarih khungtu hi MPL club inelnaah pawh a rintlak.

Vincent-a hi match hmasa pahnihah a inlan lo a, match thumnaah bul rawn ṭanin minute 21 chhungin goal hnih a khung. Coach Mala'n semifinal khel tur a thlan hunah pawh a thlan hmasak zingah a tel tawh ngei ang.

Fiah dawl CFC

Chanmari awlsam takin an chak bik lo a, goal hnih an khung hnuah Republic Veng tlangval KC Malsawmsanga hmangin minute 23-naah Electric Veng FC-in siphurh an sut ṭhen.

Chak mamawh Chanmari-in pressure an ngah leh sawt a, mahse goal hmangin pressure hi an vaw dai. Minute 36-naah Serchhip tlangval Felix Lalruatsanga'n Chanmari tan goal a khung leh a, first half-ah 3-1 a ni.

Nuamsa taka Chanmariin hnehna an chan theih nan Zozoa'n minute 51-naah a khung leh bawk. Zozoa hi Aizawl FC an hmachhawn ṭumah a che ṭha tawk lo a, damloh vangin FC Venghnuai an hneh ṭumin a khel lo. Tunah erawh Zozoa hi a dam ṭha tawh a, semifinal-ah pawh Chanmari player pawimawh a ni zui thei ang.

Chanmari coach K. Malsawmkima chuan, "Ka nauten hma an sawn a, chak duhna thinlung an nei bawk. Semifinal kan thlen theih avangin kan lawm a, player-te thawhrah a ni. Tunah chuan player thlan pawh a har ta khawp mai," tiin Vanglaini a hrilh a, semifinal-ah tum châk bik a neih loh thu a sawi bawk.