Aizawl FC-in Venghnuai lakah phuba an la

I League club Aizawl FC-in season liam ta MPL semifinal-a an hneh loh FC Venghnuai chu 4-1 in an sawp a, I Day Football semifinal an luhna kawng an dalsak bawk.

MSSC Ground, Muallungthua inkhelah chak mamawh Venghnuaiin C. Ramdinmawia penalty hmangin khung hmasa mah se AFC-in goal liin an chhanglet. R. Lalthanmawia'n I League club tan hattrick a siam a, Lalrinzuala'n goal mawi bikin a khar.

Victor Lalbiakmawia kaihhruai AFC-in chetsual nawn an tum lo a, ṭan phat aṭangin a nawrtu zawk an ni. Amaherawhchu defender Lalfamkima a fimkhur tawk loh avangin penalty a chawi a, Venghnuai captain Ramdina'n minute 30-naah goal hmahruai a khung.

Aizawl FC-in si an phur rei lo a, Amawia hmangin minute khat pawh tling loah an khung lehnghal. Lamzawl tlangval Amawia hi second match-ah a inlan lo a, rinrawl nih ngei a tum tih lantirin second half-ah hattrick a siam zui.

AFC player thar Rinzuala pawhin an lak chhan tihlawhtlingin goal a khung zel a, Venghnuai lakah hian bicycle kick hmangin a khung. Football ngainatute vanduaina erawh Muallungthua inkhelh a nih avangin Zonet-in an pe chhuak lo a, en zui tur a awm lo ang.

Aizawl FC-in match thumah hnehna an chang vek a, group hmahruaitu an ni. Semifinal-ah nikum I Day Football final rematch thlen theihna kawng a inhawng zau a, vawiin lamah tihchianin a awm ang.