Aw Romeo, Liverpool nen len dun a rem dawn em?

Premier League club Liverpool chuan a vawi thum nan midfielder Romeo Lavia lakluh tumin Southampton dawr mah se an dawrna hi hnarsak an ni leh ta a, Saints nen kum 19 mi midfielder man chungchangah an la inrem thei lo.

Liverpool hian Romeo Lavia la lut tur hian pound maktaduai 46 an theh chhuak a, hei bakah hian a khelh ṭhat dan a zira pek belh tur a la awm - mahse, Saints lam hian £50mtd aia tlawma hralh an tum lo.

Premier League aṭanga tla hlim Saints hian Championship lamah chuan match an khel der tawh a, an match hmasa berah Sheffield Wednesday chu 2-1 in an hneh - he inkhelah hian Lavia hi bench lamah a ṭhu tluan.

Season hmasa lawk khan Lavia hian Manchester City aṭangin Saints hi £10.5mtd-in a zawm a, tunah chuan a man let tam taka hralh tumin Saints an ṭang tlat.

Mamawhna

Liverpool hian nipui transfer-ah midfielder panga Fabinho, captain Jordan Henderson, James Milner, Naby Keita leh Alex Oxlade-Chamberlain an chân a, hei vang hian midfield thuam chak an mamawh hle.

Milner, Keita leh Chamberlain hi chu season zawh hma khan an chhuak dawn tih a chiang tawh a, Liverpool hi an inbuatsaih sa - Argentina tana World Cup nomawi chawitu Alexis Mac Allister chu Brighton & Hove Albion aṭangin June thla khan £35mtd-in an lei.

July thla khan RB Leipzig aṭangin Dominik Szoboszlai chu £60mtd-in an lei bawk a, Reds hian transfer bazar-ah hna an thawk ṭha thawkhat hleah a ngaih theih. Mahse, Saudi Pro League an rawn lang a, beisei loh a thleng.

Club captain Jordan Henderson chuan Steven Gerrard-a enkawl Al Ettifaq a zawm a, Brazil international Fabinho chuan Al Ittihad a zawm bawk. Hei vang hian Reds tan bazar belh a ṭul a, an la tifuh hleithei lo!

Tu nge Romeo?

Kum 19 mi chauh a la nih avangin Lavia-a'n hmabak êng tak a nei tih a chiang a, mahse, Belgian midfielder hi Fabinho leh Hendo te chhuahsan hnu hmun ruak luah turin a ṭha tawk ang em, tih chu zawhna a ni.

Season hman zawh takah khan Saints tan inelna hrang hrangah match 34 khelin goal khat a khung a, assist vawi khat a nei. City tan match hnih a khel ve hman bawk a, senior level-ah tawnhriat a la nei tam lo hle.

March 2023 khan a vawi khat nan Belgium senior team-ah koh niin, ram tan match khat a khel tawh a, tawnhriat a la ngah tawk lo. Barcelona legend Sergio Busquets leh Manchester City captain hlui Fernandinho ngaisangtu a ni a, an khelh dan anga khelh châk a ni.

Lavia hi kum 19 mi chauh a la nih avangin Reds hi zawm pawh ni se, regular taka bul ṭan reng tura sawi ngam a harsa a, chutihrual chuan player theihna nei sang tak a nih avangin Jurgen Klopp-a tan ani chan theih hi a lawmawm ang.

Liverpool hlimthla

Reds hian season ṭan hmaa an inbuatsaihna match hnuhnung berah hnehna an chang a, Thawhṭanni zan khan Preston-a inkhelah Darmstadt 98 chu 3-1 in an hneh.

German second division club lakah hian Mohamed Salah, Diogo Jota leh Luis Diaz ten goal khat ṭheuh an khung a, Darmstadt-in Mathias Honsak hmangin goal khat khung ve mah se awmzia a nei phak lo.

Liverpool tan hian player thar Mac Allister inlanin, defensive midfield-ah a khel a, attacking position lama hun hmang tam zawk ṭhin Allister hi chhawr theihna a tam hle - a khel ṭha a, hei hi Reds fan-te tan hmuh nuam a tling.

Colombia forward Luis Diaz-a goal khung pawh player thar Szoboszlai-a corner aṭanga kal a ni a, Liverpool player-te an inman hle - Liverpool hian Pathianni zanah Chelsea nen season thara an league match hmasa ber chu an khel ang.