Magpies defender thar Tino Livramento

Champions League khel tur Newcastle United chuan Southampton defender Tino Livramento an lei, a man atan pound maktaduai 32 an pe phawt a, a pun belh theihna tur nen chuan pound maktaduai 40 a tling thei dawn a ni.

Kum 20 mi Livramento hian 2021 khan Chelsea aṭangin Saints hi pound maktaduai nga lekin a zawm, hun rei lote chhungin a theihna nasa takin a tipung a, tunah chuan Newcastle tan season nga daih contract a ziak.

Magpies manager Eddie Howe chuan, "Tino hi player naupang leh theihna nei sang tak a ni a, hmabak pawh a nei êng hle. Kum 20 mi lek ni chungin tawnhriat a nei ṭha tawh a, ani kan la thei hi ka lawmin thawhdun pawh ka châk tawh hle," a ti.

Livramento hian season hmasa khan Southampton tan match 32 a khel a, heng zingah hian Premier League match 28 a tel - Magpies tan pawh player pawimawh leh rinrawl a nih chhoh theih a rinawm.

Tun nipui bazar chhungin Newcastle hian Livramento hmain Italy midfielder Sandro Tonali leh England winger Harvey Barnes te an lo la tawh bawk a, season hmasa khan EPL-ah palina an nih theih avangin an phur khawp ang.

Eddie Howe-a naute hian season thar an match hmasa ber atan August 12, Inrinni zanah Aston Villa an mikhual dawn a ni.