Liverpool tan Salah a rinawm

Saudi Arabia aṭangin Mohamed Salah lakluh tumna awm mah se Reds forward agent Ramy Abbas chuan a player chu Liverpool tan a rinawm thu a sawi a, Merseyside club ṭantute tan thawk huaina tham a ni.

Saudi chanchinbu lar Al Riyadiah chuan an ram club Al Ittihad chuan Salah hi lakluh an tum thu an ziak a, kum hnih chhunga pound maktaduai 155 hlawh tura an sawm bakah, a man atan £52mtd sen an inhuam niin an tarlang.

Mahse, Salah-a agent chuan, "Mohamed hi Liverpool tan a rinawm. Kuminah LFC chhuahsan hi tum ni ila, nikumah khan contract thar kan ziak lo ang," a ti.

Liverpool hi Saudi lamin an run na hle. Midfielder Fabinho chuan Al Ittihad zawmin, Jordan Henderson chuan Al Ettifaq a zawm a, contract hmang zo Roberto Firmino chuan Al Ahli a zawm bawk.

Kum 31 mi Salah hian nikum khan Anfield-ah kum thum dang cham chhunzawm turin contract thar a ziak a, June 2025 thleng Reds-ah hian a cham dawn. Kum 2017 khan AS Roma aṭangin Liverpool hi a zawm a, match 305-ah goal 186 a khung a, assist vawi 79 a nei.

Reds tan Champions League, Premier League, FA Cup, League Cup, FIFA Club World Cup leh UEFA Super Cup-ah champion nomawi a chawi a, Premier League Golden Boot vawi thum dawng tawhin, PFA player of the year-ah vawi hnih thlan a ni tawh.