Hammers-in Maguire leh Scott McTominay an duh

Europa Conference League champion West Ham chuan Manchester United-a tlatlum lo Harry Maguire leh Scott McTominay lakluh an duh a, Red Devils hnenah player pahnih hi pound maktaduai 50 chuanga lei tir turin dilna an thlen.

Hammers hian tun nipui transfer-ah an player chhuanvawr Declan Rice chu pound maktaduai 105 thlenga sang chho thei turin Arsenal hnenah an hralh a, anmahni lam hian player lakluh an la nei lo.

Hei chauh a ni lo - striker Gianluca Scamacca chuan Atalanta a zawm san a, season hmasa ṭan dawna Sassuolo aṭanga £30.5mtd-a an lei striker hi an hralhna man zat tarlan a ni lo. Scamacca hian Hammers tan match 27 khelin goal riat a khung a ni.

Hammers hian Manuel Lanzini chu a thlawnin an chhuahtir bawk a, Argentine attacking midfielder hi a career ṭanna River Plate lamah an kirtir.

Hello United

Hammers hian Inrinni khan an pre-season match-ah Bayer Leverkusen chu 4-0 ngawtin an ngam lo a, August 12 zanah an Premier League match hmasa ber an khelh tawh dawn bawk si avangin thuneituten an squad thuam chak vat an duh.

Hei vang hian United lam hawiin Harry Maguire leh Scott McTominay lei an dil a, he thu buatsaih a nih lai hian Red Devils lamin an chhan dan hriat a la ni lo.

Kum 30 mi Maguire leh kum 26 mi McTominay te hi Erik ten Hag-a hnuaiah an tla tlum lo a, hetihrual hian squad-ah an awm avangin hralh an nih chuan a thlakna tur United-in an zawn a ngai dawn.

Red Devils hian an player pahnih hralh ta se, an hmun ruak luah tur rim lawk an neih a ṭul a, hei vang hian Hammers dilna an pawm hmain squad tichhah tur player an melh hmasak phawt a rinawm.

Hello Alvarez

Hammers hian Ajax midfielder Edson Alvarez an dawr mek bawk a, he thuziak i chhiar meuh chuan Mexico international hi an la lut fel tawh hial mai thei - a man hi £35mtd ni tura ngaih a ni.

Tun nipuia Mexico-in CONCACAF Gold Cup nomawi an chawi theih nana player pawimawh Alvarez hi Rice thlakna turin Hammers hian an duh a, nimin khan medical a nei tawh.

Ajax defensive midfielder Alvarez hian an ram club ṭha America aṭangin a professional career zinkawng a zawh ṭan a, kum 2019 khan Ajax panin, inelna hrang hrangah match 147 a khelhsak tawh - goal 13 a khung a, assist vawi ruk a nei.

America a khelh lai hian Liga MX leh Copa MX nomawi a chawi tawh a, Dutch league-ah Ajax tan nomawi vawi hnih chawiin, KNVB Cup-ah vawi khat a champion pui bawk - kum 25 chauh ni mah se ram tan match 68 khela goal thum khung tawhin, Gold Cup-ah vawi hnih a champion pui.