England hmachhawn tur Colombia

FIFA Women's World Cup round of 16 chu nimin khan khelh zawh a ni ta a, quarterfinal-a ngaihven hlawh England hmachhawn turin Colombia an inpettling ve leh ta - nimin khan Jamaica chu 1-0 in an hneh a, a thiam pariat zingah an tel.

Colombia tan Catalina Usme chuan minute 51-naah inkhela goal awmchhun a khung a, a vawi khat nana World Cup round of 16-a inlan Jamaica lamin a chhanletna tur an neih loh avangin Colombia an chak.

Jamaica hian group stage-ah goal khat chiah khung mah se an lamah goal a lut miah lo a, an hmachhawn zingah France leh Brazil an awm avangin Colombia lakah pawh beiseina an nei sang.

Mahse, World Cup-a goal khat chiah khung chungin hmeichhe football-a ram leh ram inelna sang ber chu an mangṭha a, Colombia erawhin an ram chanchina a vawi khat nan quarterfinal an lut thung.

Colombia hian August 12, tlai dar 4:00-ah England hmachhawnin, semifinal luh an inchuh ang - World Cup quarterfinal hi Zirtawpniah an khel ṭan dawn a ni.

Nimin tlai inkhel dangah France chuan 4-0 in Morocco an hneh bawk a, World Cup nomawi la chawi ngai lo France-in a vawi khat nana champion an tumna kawngah kawng dik an zawh zel - Morocco erawh a vawi khat nana World Cup an khelh kumah last 16-ah an zinkawng a tawp.