Raonic-a'n Tiafoe a hneh

Toronto Masters khelh laiah Thawhṭanni zan khan Milos Raonic chuan American player Frances Tiafoe chu 6-7 (12), 7-6 (4), 6-3 in a hneh a, tualchhung tlangval hian a match lehpekah chuan Taro Daniel a hmachhawn leh ang.

Tiafoe hi seeded pakuana a ni a, chak zawk tura rinkai pawh a ni. Mahse, seeded zinga tel phak lo Raonic hi tun hnaiah tlahniam deuh mah se, an rama inkhel an nih avangin ṭantu a nei ṭha, tun hma lama a theihna sang tak ang kha a lantir leh bawk.

Set thum chauh khel mah se player pahnih an inkhelh tawk em avangin hun an mamawh rei, darkar hnih leh minute 44 chhung tehmeuh an inkhel a ni. Point khat hmu turin an thawhrim a ngai thei hle.

Kum 32 mi Raonic hi hliam vangin season hnih chhung a chawl a, kumin June thla khan tennis court-ah a lo kir ve leh chauh. A hliam dam hnuah tun ṭum hi tournament pathum a khelhna a ni.