Neymar-a'n Paris Saint Germain chhuahsan a duh?

Paris Saint Germain player langsarten buaina an nei chho mek zel niin a lang. Lionel Messi a chhuak fel tawh a, tun hnaiah Kylian Mbappe chu nawr chhuah duh viau mah se a chhuak duh rih lo - thuthang thar berah chuan Neymar-a'n chhuah a duh tih a ni leh ta.

France rama infiamna chanchinbu lian ber L’Equipe chuan Neymar chhuah duh thu hi an tarlang a, nimin tlai thleng kha chuan player leh club lam aṭangin ṭawngkam engmah a la awm rih lo thung.

Hetihlai hian Neymar-a pa erawhin a fapa chungchanga media zawhna chhangin, "Thil thleng lo chungchang ka sawi thei lo," a ti a, a fapain chhuah a dil loh thu a sawi.

Neymar hian kum 2017 khan Barcelona aṭangin PSG hi a pan a, pound maktaduai 200 man niin tun thlengin khawvela player man tam ber a la ni, tunah hian kum 2025 thleng daih contract a nei mek.

Kum 31 mi Neymar hian France ram huap ang chuan PSG hi hlawhtlinna hrang hrang a chanpui tawh, an duh ber Champions League nomawi erawh a la chawipui lo thung a ni.

Player ṭha leh theihna nei sang bik a ni tih chu khawvel hriat a ni a, mahse PSG tan hian a theihtawp tak meuh a chhuah ṭhin em, tih erawh zawhna awm thei tak a ni a, hei hi fans ṭhenkhatin an sawisel ṭhin chhan a ni bawk.

Neymar hian season thar atan training chu a zawm ngei a, mahse coach thar Luis Enrique nen an inkawprem dawn nge a chhuak zawkah a ṭang dawn tih chu hunin a hril thuai ang.

Tun nipui bazar chhungin PSG hian buaina chinfel ngai an ngah hle, contract hmang zo Lionel Messi-a'n contract pawh sei theihna a neih pawtsei loin Inter Miami a zawm fel tawh - Messi sulhnu hi Mbappe chuan a chhui thei dawn niin a lang mek bawk.

France international Mbappe-a'n season khat daih chauh contract a nei tawh a, a hnu lam atan pawhsei a tum lo. Hei vang hian Paris club leh an forward hi an boruak a chhe mek a, tun nipui bazar chhungin an nawr chhuak dawn nge chhawr lohin an dah kumtluan dawn tih hriat a la ni lo.