Brighton leh Caicedo inkar a ṭha lo

Premier League an ṭan hnai a, player hmuhnawm zinga mi Moises Caicedo erawh Brighton tan a khel zui dawn nge club thar a nei dawn tih a la chiang thei lo - Thawhṭanni khan an team training chu a zawm duh lo.

Kum 21 mi Caicedo hi kumin thlasik bazar lai khan Arsenal chuan lak tumin an lo dawr tawh a, sum pawh phal hnem viau mah se an hlawhtling lo. Tunah Chelsea lamin lak tumin tha an thawh ve leh mek a ni.

Arsenal nena thawm an neih hnuah Seagulls hian an player hi contract thar an ziahpui a, kum 2027 thleng daih contract a nei. Tun dinhmuna Blues lamin pound maktaduai 80 zet hum chunga an dawrna pawh an hnawl.

Pathiannia Brighton leh Rayo Vallecano ten friendly match an khelh ṭum pawhin Caicedo hi a inlan duh lo, training a zawm duh loh chhunzawm leh tak avangin buaina hi a reh mai dawn lo niin a lang.

English chanchinbu lian Guardian tarlan dan chuan, Brighton hian an player manah pound maktaduai 100 an chhiar a, an phalna zat aia tlawm chuan chhuahtir an tum lo - an phalna ang hi Chelsea lam chuan sang an ti hret thung a ni.

Chelsea manager thar Mauricio Pochettino-a'n a squad thuam chak ngei a la duh, tunah hian tlarhma lam tichak turin Dusan Vlahovic an ngaihven mek a, an striker Romelu Lukaku chu Juventus hmatawng Vlahovic nen hian inthleng dan an ngaihtuah.

An lei thar Christopher Nkunku chu khup hliam vangin a chawl mek, tunkar tawpa Liverpool nen an Premier League match hmasa ber an khelh hunah a la inlan thei lo ang, a hliam hi zai niin thla thum chhung vel chu a chawlh a ngai dawn a ni.