Evans tan nomawi pakhatna

Dan Evans chuan a vawi khat nan ATP 500 title a la. British tlangval tennis khel thiam hian Thawhṭanni zinga khelh zawh tak Citi Open final-ah Tallon Griekspoor chu 7-5, 6-3 in a hneh.

World number 21 Evans hian Dutch tlangval hneh tur hian darkar khat leh a chanve chhung hun a mamawh a, harsatna lian tham lutuk tawk loin nomawi a chawi thei tihna a ni.

Evans chuan, "Hun rei tak chhung chu tun ang hun tawng tur hian ka nghak tawh," a ti. Kum 33 mi zet a ni tawh a, tennis a khel rei tawhin a hun hnuhnung lam a ni, a tan chuan eng inelna pawh ni se a lawmawm dan a zual ngei ang.

Washington DC-a inelna neihah hian, hmeichhe inlena lamah kum 19 mi Coco Gauff chuan a khingpui Maria Sakkari chu 6-2, 6-3 a hnehin a champion ve thung a, a tan chanchin lawmawm a ni bawk.

Grand Slam hnuhnung ber Wimbledon khelh zawh takah khan Gauff hi hneh nei loin a tla, tunah erawh a insiamṭha ta. American tleirawl chuan, "Hun harsa tak ka paltlang ve a, tunah chuan chanchin lawmawm ka nei ve leh ta," a ti.

Tun season kal laiah Grand Slam pathum - Australian Open, French Open leh Wimbledon an khel tawh, tun thla tawp lam aṭangin US Open an khel leh ṭan dawn, hard court inelna lian hi tun season chhunga major tournament hnuhnung ber a ni tawh ang.