Arsenal-in Liverpool an pet chhuak

Mikel Arteta enkawl Arsenal chu ni li liam ta leka an mualphona Anfield-ah an lenglut leh a, an chesual nawn lo. Gunners hian Premier League champion hi penalty shootout-ah 5-4 a hnehin Carabao Cup last 16 aṭangin an pet chhuak.

Ningani zan inkhelah minute 90 chhunga goal a luh loh hnuah penalty hmangin chak zawk zawn a ngai. Gunners goalkeeper Bernd Leno-a'n penalty vawi hnih dangin Joe Willock chuan chakna goal a khung thung.

Season hmasa khan team pahnih hi League Cup-ah bawk an inhmawhchawn tawh, hun pangngaiah 5-5 a nih hnuin penalty-ah Reds an tlang, kuminah erawh thawnthu a danglam. Hnehna changtu Arsenal hian quarterfinal-ah Manchetser City an hmachhawn leh dawn.

Manager pahnih Jurgen Klopp leh Arteta ten player neih ṭhat zawng zawng an chhawp chhuak lo, chutihrualin a tlawm zawk nih erawh an duh lo tih an player thlan dan aṭangin a hriat theih.

Klopp-a'n defender lai ho khawm turin Virgil van Dijk chu bul a ṭantir a, tlarhma lamah Mohamed Salah a awm bawk. Player thar Diogo Jota-a'n inkhel bul a ṭan a, tawnhriat ngah James Milner leh Takumi Minamino te hmel hmuh tur a awm bawk.

Gunners lam pawhin sahuai ser lo mah se chak an duh. Willian awm hnua hmun nghet chang lo Nicolas Pepe, midfielder Granit Xhaka leh England tana kohna dawng hlim Bukayo Saka te hmuh turin an awm.

Ball chang hnema inkhel thununtu Liverpool lamin hun ṭha an insiam hnem, goal khung turin vawi tam pet mah se Leno an paltlang thei lo. Diogo Jota-a ball tauh lut ngei tura lang pawh German keeper theihna pholangtu mai a ni.

Inkhel pangngaiah Leno chu Arsenal chhandamtu a ni a, penalty-ah a ropuina belhchhahin a awm. Mohamed Elneny-a'n penalty a hlah a, Liverpool player lamin an pet goal vek chuan tlang thei dinhmunah an ding hmasa.

Mahse, keeper Leno a che fuh laklawh. Bayer Leverkusen keeper hlui hian bench aṭanga rawn lut Divock Origi leh Harry Wilson te chhuih dansakin a team a chhanhim. Hnehna a chanpui bakah hian Vito Mannone (2012) hnu lamah Anfield a Arsenal keeper clean sheet nei leh thei hmasa ber a ni.

Liverpool manager Jurgen Klopp chuan, "Minute 90 chhung khan a chak zawk awm dawn se la chuan keimahni kan ni ngei ang, mahse a pawimawh ber goal kan khung thei miau si lo. Ka naute an khel ṭha, chak zo lo mah se ṭhenkhat khelh dan kha chuan min ti lawm hle," a ti.

Arsenal manager Arteta chuan, "Kan tih dik tawk loh ṭhenkhat kan siamṭha niin ka hria, kha khan min ti lawm hle. Player zawng zawng an khel ṭha vek, a bik takin Bernd Leno a che ṭha zual, Anfield-a hnehna chang tur chuan khel ṭha fal an awm a ngai, chutiang mi chu a ni," a ti.

Quarterfinal thlir zuiin Spanish manager chuan, "Manchester City nen kan inkhel leh dawn, inelnaah kan thleng sang a nih chuan match hautak kan hmachhawn a ngai a, chumi atan chuan kan inbuatsaih mai tur a ni," a ti. Season hmasa khan Arteta hian FA Cup an chawina kawngah Man City hi an lo pet chhuak tawh a ni.

Chawlh hahdamna hun a awm mumal lo, Pathianni zan hian Premier League an khelh chhunzawm leh nghal dawn. Champion lai Liverpool hi Aston Villa khel turin zan dar 11:45 hian Villa Park-ah an lenglut ang.

Reds hian league match hmasa pathumah hnehna an chang vek a, an hneh zingah Chelsea leh Arsenal an tel. Villa pawh match hnih khel tawhin an chak ve ve, tlawm la nei lo pahnih an intawng dawn tihna a ni.

German manager Jurgen Klopp-a'n an ṭhat dan berin a naute a rem leh tawh dawn a, coronavirus kai Thiago Alcantara erawh chhawr theih a la ni lo ang; captain Jordan Henderson erawh a inlan theih tawh a beiseiawm.

Pathianni zan dar 6:30-ah Arsenal chuan Sheffield United an mikhual ang, season hmasa khan Chris Wilder hi team khawng tak ni mah se tun season-ah chak ni hmel an la hmu lo, inhamtan an duh a nih chuan insiamṭhat ran an mamawh.

Mikel Arteta-a'n league nomawi an la beisei ngam loh thu a zep lo a, a sang pali zinga tel erawh a tum. Liverpool leh Manchester City te hi a chung lama awm tura rinkai an ni a, anni bakah Manchester United, Chelsea, Tottenham leh Everton te nen an inel dawn avangin match zawng zawng a pawimawh vek.