A zawna vawi thum champion Mizoram

National Sub Junior Basketball Championship-ah Mizoram chu a zawna a vawi thum nan an champion. Nimin tlaia final hmuhnawm takah Mizoram hian Uttar Pradesh chu 63-38 in an sawp.

Puducherry-a inelna neihah Mizoram hian harsatna lian tak an tawk lo tiin a sawi theih, final-a an khingpui UP hi group match lamah 73-64 a an hneh tawh an nih avangin nomawi inchuhna inkhelah pawh boruak an ngam.

A tirah UP lamin basket nei hmasa mah se Mizoram lamin an chhanglet nghal zel a, quarter khatna tawp lam an khelh phei chuan fal takin an kal thei tawh a, an khingpui tihsual an hrem nghal zel; 17-9 in quarter khatna an hmang zo.

Thil a danglam tam lo, quarter hnihnaah pawh Mizoram bawk an chungnung. Chawlhlawk laiin coach Marc Lalthlamuana Sailo kaihhruai Mizoram hian 31-17 in hma an hruai fal tawh a, champion tur a chiang thawkhat der tawh.

Team ṭha zawk Mizoram an hawikir tawh lo, point 10 chuangin hma an hruai tluan thei. Quarter hnuhnung ber an khelh lai phei chuan point 25 zeta san fal lai pawh an nei hial, a tawpah 63-38 in an chungnung.

Inelnaah hian India ram chhunga state hrang 28 an inlan a, group parukah ṭhen hran an ni. Mizoram hi Group A-ah Maharashtra, Uttar Pradesh, Karnataka leh Kerala te nen an awmkhawm a, group match bikah an khingpuite an sawp vek.

Quarterfinal-ah group E aṭanga rawn tlang Jharkhand hnehin, semifinal-ah pawh group B team ṭha Haryana an hneh leh bawk a, final-ah pawh buaina an nei chuang lo.

Mizoram Basketball Association general secretary Zomuanpuia chuan, "A lawmawm khawp mai, a zawna vawi thum champion chu thil lawmawm bik a ni. Season thar aṭangin kalphung a danglam dawn a, under 14 bika champion hnuhnung kan ni reng tawh ang," tiin Vanglaini a hrilh.

Basketball Federarion of India (BFI) chuan season thar aṭangin kalphung a thlak dawn, kum 14 hnuai lam inelna hi a awm dawn tawh lo. Under 13, under 15 leh under 17 huanga ṭhen hran a ni tawh ang.