Fan-te buaina ka hrethiam - VVD

Liverpool captain thar Virgil van Dijk chuan season thar an hmachhawn tur chungchanga rinhlelhna awm chu a hriatthiam thu a sawi - Reds hian nipui transfer-ah player an chân nual a, mahse, pahnih chiah an la la lut thung.

VVD chuan, "Fan-ten a thim zawnga thil an thlir hi engemaw zawng tak chuan ka hrethiam khawp mai. Kei erawh chu a êng zawnga thil thlir tlat ṭhin mi ka ni thung," a ti.

Dutch defender chuan sawi zawmin, "Chutihrual chuan player engemawzat an chhuak a, captain leh vice captain an chhuak a, tun dinhmunah player pahnih chiah kan la la lut rih bawk.

"Kan khelh dan lahin duhthu a la sam lo. Ball kan keng thei viau a, chutihrual chuan goal chhuah kan la hrat hle. Fans ṭhenkhatin rinhlelhna nena min la thlir hi chu ka hrethiam êm êm a ni," a ti.

Reds hian nipui transfer-ah midfielder pahnih Alexis Mac Allister leh Dominik Szoboszlai la lutin, Reds fans tan lawmna tham ni mah se a chhuak lam thlir erawh chuan duh khawp a la har viauin a rinawm.

Liverpool hian club captain Jordan Henderson, Fabinho, Naby Keita, James Milner leh Alex Oxlade-Chamberlain te chu midfielder an chhuahtir a ni a, forward Roberto Firmino a chhuak tawh bawk.

Midfield bik hi thuam ṭhat a ngai tih a lang chiang a, an neih sa zingah Thiago Alcantara leh Stefan Bajcetic chu hliam vangin an la chawl mek a, coach Jurgen Klopp chuan Cody Gakpo chu pre-season match-ah midfield angin a chhawr ṭhin hial.

Liverpool hian Southampton midfielder Romeo Lavia chu vawi thum an dawr hlawhchham tawh a, Saints hian pound maktaduai 50 tal an phut - kum 19 chauh a la ni a, tawnhriat a la neih tlem bawk avangin heti zata lei chu Reds tan a na mai thei.

VVD chuan, "Kan elpui tur team-te thlirin, season thar pawh hi a harsa dawn tih a chiang a, mahse, chutihrual chuan a sang zinga awm leh kan duh a, nomawi chawi tura beih kan duh.

"Kan inrintawk a ṭul a, ni tin inzirthar reng pawh kan mamawh. Player langsar tak tak, kan hlawhtlinna kawnga pawimawh êm êm te an chhuak a, midang tan mawhphurhna lak a ṭul tihna a ni mai. Ka ngaihdanah chuan chu chona chu phurawm ka ti a, kan phur tur a ni. Kei pawh ka phur a, theihtawp chhuah ang u," a ti a, champion nomawi chawi a tum.

Liverpool hian August 13 zanah season thar atana an match hmasa ber an khel dawn a, Stamford Bridge-ah coach thar Mauricio Pochettino hoa indinthar mek Chelsea chu league match khel turin an lenchilh ang.