GIG Motors I Day Football: Project Veng tan Police an ṭha hret

Hun pawimawhah Mizoram Police danglamna a lang ṭhin a, I Day Football group match hnuhnung berah pawh Lalbiaksanga Colney hoten champion zia an chhuah.

Nimina Muallungthua inkhelah hian Police leh an khingpui Project Veng FC-in semifinal luh beiseina an nei ve ve a, BS-a hote hi 3-0 in chak.

Amaherawhchu Police-in Chhinga Veng an hneh loh avangin group B-ah pahnihna an ni a, semifinal-a an khingpui tur chu nikum final-a an hneh Aizawl FC an ni. Final tluk zetin team ṭha pahnih inkhel tur hi en a châkawm.

MSSC Ground-ah chak mamawh team pahnih an inkhel a, Project Veng pawhin mawihnai taka tlak ai chuan risk lak an thlang zawk.

Kolasib club-in huaisen taka an khelh avangin inkhelh ṭantirh lamah penalty shout ṭum hnih an nei a, an pe lo ve ve. Mizoram Police erawh an vannei thung a, box chhungah Project Veng defender Dominic Lalchhanhima'n Police winger Lalbiakhlua (Biaktea) a tihtluk avangin penalty an hmu.

Minute 23-naah Lalbiaklua (Hlutea) rawn pen chhuakin goal-ah a chantir a, penalty aṭanga goal thum a khungna a ni. Police game a nghet ṭha a, Malsawmfela leh Lalfakzuala ten chance ṭha an hlah.

Project Veng pawhin siphurh sutna remchang an nei. Tualcheng tlangval Lalfamkima'n goal ban a pet per a, Kolasib tlangval Andy Lalrinpuia'n chance ṭha bik a hlah bawk. Mahse, Kolasib club hian goal khung tuma an nawr lutuk an tuar a, Sawmfela'n a class pholan nan hmangin minute 65-naah keeper chauh a hmachhawn hnuah harsatna nei loin a khung.

Bench aṭanga rawn lut Lalnunsanga (Talea) pawh a thlunna phelh ang zar zar a ni a, Armed Veng South tlangval hian tun inelnaa khelhna hun an pek hmasa berah goal a khung nghal. Minute 77-naa goal hi Talea tih ṭhat liau liau a ni a, amaherawhchu Talea hian hun tawp dawn hnaihah penalty a hlah thung.

Police 3-0 in an chak a, I League club Aizawl FC hmachhawn turin an inringtawk khawp ang. Project Veng erawhin match thumah point an hmu lo a, I Day Football hi MPL atana zirlai ṭha tak a ni ang.