I Day Football aṭangin Chawnpui an tla

GIG Motors I Day Football 2023 aṭangin MPL champion lai Chawnpui FC an tla. Nimin inkhelah Chawnpui FC-in chak an mamawh mah se Chhinga Veng nen 2-2 in an inhnehtawk avangin an beiseina a tawp. Group match inkhel hnuhnung berah Republic Veng tlangval Lalnunzira leh Serchhip tlangval Johny Lalremruata te goal hmangin Chhingcows-in ṭum hnih hma an hruai a, Chawnpuiin David Lalchhuanawma leh Lalhmangaihsanga te hmangin an sut ve ve.

Inkhelh hma hian Mizoram Police-in Project 3-0 a an hneh avangin Chawnpui tan semifinal lut turin goal hniha chak a ngai. Chhingcows tan erawh 1-0 a chak loh pawhin knockout stage a luh theih a, I League club Aizawl FC pumpelh an duh erawh chuan point hmuh ngei a ngai thung.

MSSC Ground, Muallung-thuah beiseina la nei club pahnih inkhel a nung ṭha a, inkhel pawh a hmuhnawm. Chawnpui an khel ṭha a, goal chance ṭha bik erawh neih an harsat thung.

Chhinga Veng erawhin an hun ṭha neih an bawhpelh lo. Minute 40-naah Chawnpui midfielder Vanlalthanga ball an chhuhsak hnuah Zirtea'n yard 40 vel aṭangin a hlap kual lut a, goal ropui a ni.

Goal hnih mamawh Chawnpuiin second half-ah an nawr chhunzawm a, Chhinga Veng tlarhnung phui ṭha viau mah se handball vangin penalty an chawi. Chawnpui striker David Lalchhuanawma'n minute 78-naah siphurh a sut ṭhen.

Chhinga Veng an insiamrem vat a, midfielder Johny-a'n box pawn aṭangin tawih zetin minute 81-naah a khung. Serchhip tlangval Johny hian tun inelnaah match tinah goal a khung vek. Lalsangzuala Hmar hote chak tawh turah an inngai a, mahse injury time-ah defender Lalhmangaihsanga hmangin Chawnpuiin siphurh a sut zo. Goal dang luh belhna hun erawh a awm tawh lo.

Chhingcows-in point thum hmu lo mah se point sarih an hmuh avangin group B pakhatna an ni. Sanga hote hian semifinal-ah K. Malsawmkima enkawl Chanmari FC an hmachhawn ang.