Joshua hmaa Helenius a ding dawn

Inrinni zan a ni tawh - Anthony Joshua-a'n ring chhung rapa fight a hmachhawn hun tur chu! Mahse, a hmachhawn tura ruahman sa Dillian Whyte-a'n 'test' a paltlang zo lo a, Joshua hmachhawn turin Robert Helenius chu biak fel a ni.

Joshua leh Whyte te hi Inrinni zanah a vawi hnih nan in fight tura tih an ni a, mahse, Joshua hmachhawn tur Whyte chuan 'test' a paltlang zo lo - damdawi hman phal loh a thisenah hmuh a ni a, amah erawhin a pha nasa hle.

Mahse, dan angin boxer rothap pahnih inhmachhawn tur hi kaltlangpui theih a ni lo a, kar hmasa khan Joshua vs Whyte chu neih loh tura tih a ni - boxer dang biak zui an ni a, Helenius leh Joshua an inhmachhawn dawn.

Boxer pahnih intawnna tur hi London khawpuia O2 Arena a ni a, Inrinni zan dar 11:30-ah a ni ang - inhnek hi a en duh tan DAZN-ah online in a en theih a, DAZN hi thla khat subscribe man Rs. 799 a ni.

A thlawn mai maw

Joshua hian December 2015 khan Whyte hi lo hmachhawn tawhin, round sarihnaah knockout hmangin a hneh a, British heavyweight title a hlawh chhuak - a hun laiin boxer pahnih inhnek hian boruak a siam hle.

Kuminah a vawi hnih nan boxer pahnih hi intawng leh turin an inbe rem a, boruak pawh ṭum dang ang thoin a 'hot' - July thla khan a vawi hnih nana British boxer pahnih intawn tur thu hi puan a ni.

Boxer pahnih hi amateur an nih lai pawha lo intawng tawhin, hemi ṭum hian Joshua a tlawm thung - tun Inrinnia inhnek hi 1-1 result chinfelna tur ti pawha sawi theih a ni a, mahse, Whyte-a'n test a paltlang zo ta lo.

Whyte hian engmah tihsual a neih loh thu sawiin, "Ka damdawi hman anga an sawi hi ka la hmang ngai lo hrim hrim," a ti a, a thiamthu sawina hun pawh pe loa an fight hmabak cancel a ni mai chu hriatthiam har a tih thu a sawi bawk.

Mi puitling Joshua

Voluntary Anti-Doping Association (VADA) lam chuan Whyte-a'n test a paltlang loh thu hi promoter Matchroom leh boxing thuneitu lamah an hriattir a, hetiang boruak karah hian Joshua promoter Eddie Hearn chuan a boxer hian thil thleng chu lungdam taka a pawm thu a sawi.

Hearn chuan, "Kumina fight ropui ber leh ngaihven hlawh ber tur a thlen hma kar khatah tih theih a nih loh thu kan hria a, ka hrilhhaiin a mak ka ti takzet. AJ-a message min lo thawn chu ka rin loh takin a hahdamthlak hle a ni," a ti.

Promoter lar Hearn chuan a boxer chu fight hmachhawn tura a inpeih tawh takzet thu sawiin, "AJ hian fight hmachhawn a châk êm êm a, hetiang ang reng renga ṭha hian ka la hmu ngai lo," a ti a, a boxer a fak hle.

Joshua hi a zawna Oleksandr Usyk a ngam loh hnuah a insiamṭha leh mek - April khan Jermaine Franklin hmachhawnin a hneh a, O2 Arena-ah tho a ni. Tunah Helenius a hmachhawn leh dawn a, hneh ngei a inbeisei ang.

Tu nge Helenius?

Joshua hmachhawn tur Helenius hi amah ang ema boxer langsar ni lo mah se a sulhnu thlirin ngaihnep chi a ni lo - 'The Nordic Nightmare' hminglem an pek boxer hian vawi 36 inhnek hmachhawn tawhin, vawi 32 a chak a, vawi li chiah a la tlawm.

Boxer a hneh 32 zinga 21 chu knockout hmangin a hneh a, European Union heavyweight title, WBA & WBO Inter-Continental heavyweight title a lo la tawh bawk. Mahse, nikum October khan boxer langsar Deontay Wilder chu hmachhawnin, round khatna lekah a tlawm.

Chutihrual chuan Wilder a ngam loh hnuah Helenius hi a insiamṭha leh tawh a, August 5 khan Mika Mielonen chu technical knockout-in round thumna lekah a hneh - Joshua a hmachhawn tur hre har mah se tun thlatira fight hmachhawn a ni a, a 'fit' vanglai tak a ni dawn tho.

Finnish boxer Helenius chuan, "Viking dik tak, thawklehkhata hriattrina dawn pawha fight hmachhawn nghal tura inpeih reng ka ni," a ti a, Joshua lakah tlanchhiat a tum loh thu a sawi.

Joshua a inpeih

Helenius-a'n Joshua hmachhawn tura a inpeih sa thu a sawi a, a duhtawk mai lo - boxing khawvela hming langsar Joshua hmachhawn chu a tan hun remchang a nih thu a sawi a, a thlawna zamraltir mai a tum lo.

Kum 39 mi boxer chuan, "Hetiang ang hun duhawm hi a lo thlawn maia chantir ka tum lo a, chhawr ṭangkai ngei ka tum dawn a ni," a ti a, British boxer lakah hnehna chan ngei a tum.

Joshua chuan, "Kan inruahmannaa tel lo thil a lo thleng a, hnehna chan ngei tumin theihtawp ka chhuah chhunzawm ang," a ti a, boxer dang daih hmachhawn dawn mah se tlawm a tum lo.

Kum 33 mi Joshua hian vawi 28 fight hmachhawn tawhin vawi 25 a chak a, vawi thum a tlawm - a chak zingah hian vawi 22 a khingpui a knockout thei. WBA (Super), IBF, WBO leh IBO heavyweight title zawng zawng kawl vek thei lo ni tawh boxer hian thawhleh a tum mek e.