Man United bihchianna Squad chhah ṭha tak ka duh - Ten Hag

Manchester United-in Harry Maguire, Scott Mc Tominay, Fred leh Donny van de Beek te chhuahtir an duh a, tun nipui bazarah an chhuah theih pawh a rinawm. Hemi chungchang zawhna chhangin Erik Ten Hag chuan, "Thil la thleng lo chungchang ka sawi lawk thei lo. Chutihrualin squad chhah ṭha tak ka duh a, position tinah player-te hi inel se ka duh a ni," tiin a sawi.

Nipui bazarah Man United-in player an lak belh thei a, an neih belh lo a nih pawhin an duh ang player chu an la lut tawhah a ngaih theih. Season ṭan hmain an inla lut fel thei a, insiamrem nan hun an mamawh rei lo ang.

Goalkeeper: Ten Hag-a'n Ajax-a a hriatchian sa goalkeeper André Onana an la lut. Pre-season friendly-ah Cameroonian keeper hi sawiselna lai tur zawngtuten duhkhawp loh lai nei bawk mah se save ṭha a neih bakah a ke hmangin ball a sem ṭha a, David de Gea aia an thlang hi tun thleng chuan a la dik zelah a ngaih theih zawk.

Defender: Season khat chhung Ten Hag-a'n United a enkawl tawh avangin a player neihte a hrechiang chho a, tunah chuan Lisandro Martínez leh Raphaël Varane te an inkawp nghet tawh. Tun hmaa rinrawl ni ṭhin Victor Lindelof chu an thachhang dawltu niin captain Maguire erawh an chhuahtir dawn. Man United hi Maguire thlak nan Benjamin Pavard (Bayern Munich), Jean Clair Todibo (Nice) leh Edmond Tapsoba (Bayer Leverkusen) te nen sawi zawm an ni.

Mual vei lam atan Tyrell Malacia an la lut a, Dutch defender awm hnuah Luke Shaw a ṭha sawt. Shaw hi khawih chet thiang lo anga ngaih a ni. Ding lamah erawh Aaron Wan-Bissaka-a'n nasa taka hma a sawn avangin Diogo Dalot nen hmun nghet chan tumin an inel zel ang. Tlarhnung lam hi chu an ziaawm viau, season liam ta pawhin Arsenal nen league-a an goal chhuah zat a inang (goal 43). Mahse, champion Man City leh Newcastle United te aiin goal 10-in an chhuah tam a, team anga insiamṭhat an mamawh ang.

Midfielder: Casemiro awm hnuah Man United midfield a ṭha sawt a, theihna nei sang Christian Eriksen awm bawk mah se chak lohna lai nei tho an ni. Season liam ta khan Casemiro-a'n hrem vangin match pawimawh a khel lo a, Eriksen-a inhliam vangin season chanve a khel thei lo bawk.

Hei vang hian Fred leh Scott McTominay te chhawr a ṭul leh ṭhin a, midfield tihchak nan Marcel Sabitzer chu Bayern Munich aṭangin loan hmangin an la bawk. United khelh dan thlirin Fred, McTominay, Sabitzer leh Van de Beek ten Ten Hag-a mit an tlung lo a, Sabitzer pawh contract an ziahpui lo.

Nikum lama an goal chhuah ṭhahnem takah Eriksen-a'n mawh a phur a, nipui bazara an player lak hmasak ber Mason Mount a ni hi thilmak a ni lo. Chutihrualin Mount hi mamawh chhanna a ni ang em, tih chu hunin a hril ang. Ten Hag-a'n a ṭul dan a zirin naupang a khelhtir tel pawh a rinawm a, kum 18 mi Kobbie Mainoo pawh squad tichhahtu a ni thei ang. No. 10 hna chelh tur chuan captain Bruno Fernandes a awm a, a rintlak hle.

Forward: Man United tlarhmaah talent a tam a, team chakpui thei player tia han thur chhuah tur erawh an vang pharh thung. Marcus Rashford hi United tlarhmaa rintlak ber a ni a, chutihrualin English striker hi season tluana khelh ṭhat a la nei lo. Premier League-ah goal 20 khung tlin a la nei lo!

Tun hnaia man to taka an lakluh Jadon Sancho-a'n a tawp a khar thei ṭhin lo a, United aṭanga chhuak tur anga hial sawi te pawh a awm hman. Mahse, kum 23 chauh a ni a, a theihna anga khelh chhuah chuan team chakpui thei player tih theih tur zinga mi a ni ang. Brazilian forward Antony a danglam tam lo a, season ṭantirhah thawm nei ring viau mah se league-ah goal li chauh a khung.

Kum 19 mi Alejandro Garnacho-a'n hmabak a nei êng a, Argentine winger hi a huaisen bawk avangin mual sir aṭanga United goal nawrna ṭha ber ang hiala ngaih theih a ni zawk. Season liam ta khan bench aṭanga a luh nen match 19 khelin goal thum a khung a, tun season-ah a inlan tam a rinawm.

Sancho leh Anthony te ang thoa United zawm tirha boruak siam Anthony Martial pawhin theihna sang tak nei mah se hliam vangin a buai reng. United a zawm tirha kum 19 mi Martial hi kum 27 mi a ni tawh a, a khelh tam tawk loh avangin FIFA World Cup-ah pawh France squad-ah a awm pha lo.

United-in beiseina an neih san ber tur chu Rasmus Hojlund a ni a, hliam tenau a neih avangin league match hmasa bera Wolves nena an inkhelh hunah chuan a inlan a rinawm lo zawk. Chutihrualin Hojlund hi kum 20 mi chauh a ni a, season khata league-a goal 10 khung tlin pawh a la neih loh avangin mawhphurhna zawng zawng phurhtir ngam a la ni kher lo ang.

Mahse, United ṭantute lawmna tur thu thar a awm hnai niin a lang. Player goal khung thei bik Mason Greenwood-a'n mimalin training a nei leh tawh a, club lamin an ngaidam dawn, tih thawm a awm bawk. Chutihrualin Greenwood hi inkhel nghal turin a inpeih a rinawm lo a, ngai awh tura reserve team aṭanga bul a ṭan leh phawt a ngaih dawn avangin hmanhmawh theih a ni lo ang.

Ten Hag-a'n player lei nana sum a hman tam miau avangin United squad a chhah ṭha thawkhat a, chutihrualin champion tur chuan vanneih tel an mamawh ang.