Jerry-a'n Thailand a thleng

Mizo left back ṭha Jerry Lalrinzuala chuan nimin zing khan a club thar Odisha training zawm turin Thailand a thleng. ISL club Odisha-ah Mizo 10 zet an awm dawn.

India international Jerry chuan, "Champion tura rinkai kan ni phakin ka hria. Roy Krishna bakah Ahmed Jahouh te an awm thar bawk a, ka phur khawp mai," tiin Vanglaini a hrilh.

Jerry chuan sawi chhunzawmin, "Tun ṭum chu chawlh ka hmang ṭha - fitness coach GTea puihnain kg nga chuang hret ka paih. Ka fitness a ṭha a, season ṭha tak ka hman theih ka ring," tiin a sawi a, season tharah taksa rih deuh vanga beisei pha ṭhin lo Jerry ṭha zawk hmuh theih a beiseiawm.

Chawlh laiin Jerry hian Odisha-a a khelhpui tur Laldinliana Renthlei leh K. Lalṭhathanga (Puitea) te nen Project Fitness-ah training an nei ho a. Coach K. Lalbiakzuala (GTea) hian basketball player Lalrina Renthlei leh boxer NT Lalbiakkima te training pe ṭhin bawk.

Odisha-a Mizo 10 awmte chu Jerry, Dinliana leh Puitea bakah Jerry Mawihmingthanga, Isaac Vanmalsawma, Isak Vanlalruatfela, Paul Ramfangzauva, Lalliansanga Renthlei, Lalthuammawia Ralte leh CVL Remtluanga te an ni. Defender Lalhrezuala Sailung chu loan-in Aizawl FC-ah a khel chhuak thung.