Wolves leh Lopetegui an inṭhen

August 14, Thawhṭanni zanah Wolverhampton Wanderers-in season thara an Premier League match hmasa ber an khel tawh dawn a, an hmaa ding tur lah Erik ten Hag hoa beiseina sang tak neitu Manchester United a ni.

Hei chauh a ni lo - an inkhelhna tur hmun hi Old Trafford a ni a, hetiang boruak karah hian Wolves fan-ten chanchin lawmawm lo hriat tur an nei a, coach Julen Lopetegui chuan Wolves a chhuahsan!

Wolves chuan thuchhuah siamin, "Lopetegui nen inbiakna neih a nih hnuah, kan ngaihdan inan lohnate chu sawi ho a ni a, a chinfel dan ṭha ber chu inṭhen mai hi niin kan hria a ni," an ti a, club sporting director Matt Hobbs chuan, "Season thar hmachhawn ho kan duh laiin, ngaihdan inan lohna a awm avangin inṭhen a ngai ta a ni," a ti bawk.

Premier League club hian Bournemouth manager hlui Gary O'Neil chu Spanish coach thlak tur hian an la lut nghal dawn a, he thuziak i chhiar meuh chuan an inrem tawh hial mai thei.

Inrem tak chungin

Wolves hian July 29 khan friendly match-ah Celtic chu 1-1 in an inhnehtawkpui a, hetihlai hian Lopetegui hian Premier League club hi chhuahsan a duh daih tawh. Mahse, Wolves lam hian amah thlaktu tur an zawn chhung nghak hram turin an ngen a, an ngen angin a nghak.

Premier League club Wolves chuan, "Lopetegui leh a staff ten season thar atana squad an lo buatsaih lawk theih nan te, a thlaktu tur coach kan lo zawn theih nante inbiakna hi rei tak kalpui a ni tawh a, inzahtawn tak chung leh inhuatna awm miah loa engkim kalpui a ni," an ti.

Wolves hian Lopetegui thlaktu tur hian coach engemaw zat chu an thlithlai a, a tawpah chuan O'Neil hian an lung a dum ta ber niin a lang - English coach hian season hmasa khan Bournemouth a enkawl a, Premier League a inhamtanpui.

Mahse, Cherries hian heti chung hian June thla khan O'Neil nen an inṭhen thu an puang a, Premier League club erawh a enkawl chhunzawm dawn ta tho a ni - kum 40 mi niin, Bournemouth tih loh club dang enkawl a la nei ngai lo.

Buaina chu

Lopetegui hian nipui transfer-ah squad thuam chak a duh a, mahse, Spanish journalist Guillem Balague chuan Wolves lam hian an coach hi tun nipuia player thar lakluh an rem tihsak lo niin a sawi.

Real Madrid boss hlui Lopetegui hian November khan Wolves hi enkawl ṭanin, khatihlai khan Premier League-ah table mawngphah luahtu an ni - mahse, Spanish coach hian table-a 13-na ni chungin season a kharpui a, hna a thawk ṭha hle.

Kum 56 mi coach hian player thar lakluh a phut a nih pawhin a result nena enkawpin a awm thlap. Mahse, Wolves lam hian financial fair play dan chuan player lakluh an tumna kawng a dal niin an sawi a, Lopetegui nen an thu a inhmu lo.

Wolves hian FFP dan bawhchhe lo turin tun nipui transfer-ah hlawkna an tel a ngai - chuti a nih loh chuan kum thum chhunga FFP-in club sum hloh a phal chin, pound maktaduai 105 an khum thei dawn a, hrem theih an ni ang.

Phatsanna?

Lopetegui hi Wolves a zawm hma khan, club thuneitute chuan Championship lamah a tlakpui lo a nih chuan transfer bazar-a hman tur sum an pek tur thu an hrilh a, player man to tak tak pe thei lo mah se player naupang leh theihna nei sangte la lut tura sum an pek tur thu an hrilh.

Mahse, season a tawp khan Wolves thuneitute chuan an sawi anga an tih theih loh tur thu an hrilh a, free transfer baka player lakluh a rem loh tur thu an sawi. Lopetegui nena inhnimhnai tak Guillem Balague-a sawi dan chuan, Spanish coach hian a tirah hrethiam lo mah se, 'chona thar' tiin hei hi a pawm.

Wolves an rinawm lo nawn - free transfer-a lakluh tur player zawng tura an tih hnuah Lopetegui chu player a lakluh theih loh thu an hrilh a, Spanish boss hian hei meuh hi chu a hrethiam tawh bik lo.

Lopetegui hian European football hial beisei tur team din a tum a, chutihlaia player lakluh belh phal miah lo chu Spanish coach tan a mu keng tel loa silai nena ramsa pel ang chiah a ni - awmzia awm loah a ngai.

Mangṭha le

Lopetegui hi Spain leh Real Madrid meuh lo enkawl tawhtu, Kum 2020-a Europa League-a Sevilla champion puitu a ni a, a sulhnu a ropui hle - Premier League aṭanga hming chher thar leh a, top club enkawl leh a duh.

Mahse, Wolves-in a beisei ang sum an pe thei lo a, a tum ram thleng thei lo turah a inngai. Chu chauh a ni lo - Wolves hian vawi hnih ngawt an thu an thlak danglam a, hei hi coach, "Kei ka ni," inti ve tan chuan pawmdam theih a ni lo.

Lopetegui hian a theihna tak tak chu Wolves hian an hmanchhuahsak tawk loah a ngai. Spanish coach hian Wolves dinthar turin talent leh contact a nei ṭha tawkah a inngai a, top 10 huang chhungah regular taka awm tir a, Europe beisei ngam team-a din a duh.

Mahse, Wolves ber hian transfer-a sum sen an hreh tlat a, Lopetegui a chhuak ta. Spanish coach chuan, "Wolves leh he club-a mi zawng zawngte an hma hun atan duhsakna ka hlan a, he club ropui tak enkawl tura hun ṭha min siamsak avangin lawmthu ka sawi bawk," a ti.

Hralh dawn lo

Lopetegui-a chhuah chhan thlirin Wolves hian pawisa an nei lo, tih phat rual a ni lo a, heti chung hian club chairman Jeff Shi chuan fan-te hnenah lehkha thawnin, club neitu Fosun International chuan club hralh tumna an neih loh thu a sawi.

Shi hian club hralh dawn lo mah se, Premier League FFP ngaihtuah chunga fimkhur taka an kal a ngaih thu a sawi bawk - Wolves hian tun nipuiah club defender hlui Matt Doherty chu free transfer-in an la lut a, tun thlengin player dang lakluh an la nei lo.

Hetihrual hian club captain Ruben Neves chu Saudi Arabian club Al-Hilal hnenah pound maktaduai 47-in an hralh a, an club chanchina player an hralh to ber a ni. Striker Raul Jimenez chu Fulham hnenah £5mtd-in an hralh bawk.

Heti chung hian Wolves-in player la lut theiah an inngai lo a, Lopetegui a chhuak. Club sporting director Hobbs chuan, "Rim taka thawk chunga pre-season ṭha tak min hmanpui hnuah, season thar hmachhawn tura inpeihsa diam squad min hnutchhiah a ni," a ti a, Spanish coach leh a staff te chungah lawmthu a sawi zui.