Hnehna nen Wozniacki a lo kir

Hun engemaw ti chhung tennis a chawlhsan hnuah Caroline Wozniacki a lo kir leh a, nimin zing khan Canadian Open-ah inlanin a match hmasa berah Kimberly Birrell chu 6-2, 6-2 in a hneh.

Wozniacki hi a vanglai chuan world number 1 hial pawh ni phak a ni a, ranking sang ber dinhmun hi chawlhkar 71 chhung tehmeuh a lo chelh tawh, kum 2020 khan tennis chawlhsanin fa pahnih a nei.

Tunah chuan a lo kir leh ta a, kum 33 mi ni tawh mah se Australian Open 2018 champion hian theihna a la nei sang hle. A match lehpekah chuan Marketa Vondrousova a tum ang, inkhel dangah Wimbledon champion Vondrousova hian Mayar Sherif chu 6-4, 6-2 in a hneh ve bawk.

Wozniacki chuan, "Ka tan chuan thil lawmawm bik a ni, tun hma aṭangin Montreal Masters khelh hi nuam ka ti zual a, chumi hmunah ngei mai chanchin ṭha ka nei hian min tilawm," tiin a sawi.

US Open inbuatsaihna zingah chuan Canadian Open hian ngaihven a hlawh, hmeichhe inelna hi Montreal Masters tih a ni a, mipa inelna erawh Toronto Masters tiin an sawi ṭhin thung.

Hmeichhe singles inkhel dangah Danielle Collins chuan Ukraine nula Elina Svitolina chu 6-2 6-2 in a hneh a, seeded 10-na Daria Kasatkina leh Liudmila Samsonova te pawhin an khingpui ve ve hnehin second round an inhlangkai ve bawk.