Spurs player thar Veliz leh Van de Ven

Tottenham Hotspur chuan an squad an thuam chak, player hmabak nei êng tak pahnih Netherlands Under-21 defender Micky van de Ven leh Argentina U20 forward Alejo Veliz te an la lut fel.

Kum 22 mi Van de Ven hi German club Wolfsburg aṭangin an la, a man zat hi pound maktaduai 34 an pe phawt a, a pun belh leh theihna tur nen chuan pound maktaduai 43 a tling hial a ni.

Veliz hi kum 19 mi chauh a la ni thung a, North London club hian Rosario Central aṭangin pound maktaduai 13 sengin an la lut thung a, an player thar pahnih hian kum ruk chhung atan ve ve contract an ziak.

Tun nipui bazar chhungin Spurs hian player panga an la lut tawh. Veliz leh Van de Ven te hma hian England midfielder James Maddison, Italian goalkeeper Guglielmo Vicario leh Israel winger Manor Solomon te an la tawh bawk a ni.

Netherlands Under 21 tan Van de Ven hian European Championship-ah khan captain armband a hreng phak a, a lakah beiseina a sang nghal dawn. Premier League season thar tir aṭanga chhawr theih tur a ni ang.

Dutch club Volendam aṭangin kum 2021 khan pound maktaduai thum lekin Wolfsburg hi a zawm, season hmasa khan Bundesliga match 33 a khel, league match bikah chuan vawi khat chauh inlan loh a nei tihna a ni.

Veliz erawh a kum a la naupang deuh a, Argentine club tan inelna hrang hrangah match 62 a khelhsak tawh a, heng aṭang hian goal 19 a khung. Tlarhma lamah elpui tur a la nei hautak deuh dawn a, hmun chang tur chuan a nghah rih deuh a ngaih a rinawm.

Tottenham hian season thar inbuatsaihna hnuhnung atan Thawhlehni zan khan Barcelona an hmachhawn a, 4-2 in an chak lo. Catalan club lakah hian an striker ṭha Harry Kane chu a inlan ve lo.

England captain hian chhuah a duh a, mahse club thuneitu lamin chelh an duh thung. Kane leh Bayern Munich ten thawm an nei ngun viau a, mah se thu chiang erawh an nei hleithei lo a ni.

August 13, Pathianni zan dar 6:30 hian season thar an match hmasa ber atan Spurs hian Brentford an lenchilh ang.