Second round-ah Murray leh Zverev an lut

Canadian Open khelh laiah Andy Murray leh Alexander Zverev te chuan an khingpui ve ve hnehin first round an paltlang a, Cameron Norrie leh Dan Evans te erawh an zinkawng a tawp nghal.

Thawhlehni zan inkhelah kum 36 mi Murray hian Lorenzo Sonego chu 7-6 (7-3), 6-0 in a hneh, Italian tlangval laka hnehna chang turin world number 1 hlui hian darkar hnih leh minute kua hun a hmang.

Toronto Masters hi ATP Masters 1,000 zinga mi a ni a, inelna lian ber Grand Slam dawt chiaha awm a ni. Tun hmain Murray hian kum 2009, 2010 leh 2015 khan nomawi a lo chawi tawh, kuminah erawh rinkai ber a ni phak lo.

Grand Slam vawi thum champion tawh Murray chuan, "Vawi thum ka champion tawhna hmu a ni a, mahse ka hlawhtlinna chante hi a rei tawh a, tunah chuan boruak a danglam tawh, engkim mai hi thil thar ang mai a ni," a ti.

Murray hian a match dawt lehah chuan Max Purcell a tum dawn. Australian player Purcell hian inkhel dangah seeded 10-na Felix Auger Aliassime chu 6-4, 6-4 in a lo hneh ve thung.

Mipa singles champion thei tur zinga mi Zverev chuan Washington Open finalist Tallon Griekspoor chu 6-4, 7-6 (3) in a hneh ve bawk a, a tir lamah German tlangval hian set hnihnaah fiahna tawk mah se a paltlang thei a ni.

Zverev chuan, "Hard court bikah chuan thla li hnua ka inkhelh ve lehna hmasa ber a ni a, a awlsam lem lo khawp mai. Ka inlan hnuhnung ber pawh kha kerek hliam vangin 100% ka ni lo, chuvangin tun ṭumah pawh hian rilru chu a thlamuang chiah lo," tiin a sawi.

Inkhel dangah Cameron Norrie chuan Alex de Minaur chu 7-5, 6-4 in a ngam lo, world number 13 Norrie hian set khatnaah set point hmu mah se a chhawr ṭangkai thei lo a, set hnuhnung zawkah a dinhmun a siamṭha zo tawh lo.

Dan Evans chuan tualchhung tlangval, wildcard hmanga inlan Gabriel Diallo chu 7-6 (7-4), 7-5 in a hneh lo, world number 21 Evans tan mualphona a tling.