Nepal Army lakah Delhi an vannei

India rama football season bul ṭanna ngaihhlut hlawh Durand Cup pawh khelh mek zel a ni a, nimin lama inkhel hmasaw zawkah Delhi FC leh Nepal Army Club te chu 1-1 in an inhnehtawk.

SAI Stadium, Kokrajhar-a inkhelah Nepal Army tan Dinesh Henjan chuan minute 40-naah goal hmahruai a khung a, hei hi an chakpui mai dawn niin a lang hman.

Mahse, I League club Delhi FC tan Girik Mahesh Khosla chuan minute 88-naah si phurh sutna goal a khung a, hun tawp thlenga goal dang lut tawh loin team pahnih hi 1-1 in an inhnehtawk.

Delhi FC tan match hnih an khelh aṭanga point hnih an hmuhna chiah a ni a, Nepal club hma hian ISL club Hyderabad FC chu 1-1 in an lo inhnehtawkpui tawh.

Tribhuvan Army tia hriat lar ni bawk Nepal sipai team tan an match hmasa ber a ni a, ISL club Chennaiyin leh Hyderabad te an hmachhawn a la ṭul dawn avangin a awlsam lo ang.

Nimin inkhel hnuhnung zawkah Gokulam Kerala chuan hnehna an chang bawk a, anni hian Indian Air Force chu 2-0 in an hneh - Kerala club tan hian Sourav K leh Shreekuttan VS ten goal khat ve ve an khung a, Air Force lamin a chhanletna tur an nei thei lo.

Indian Air Force tan Santosh Trophy-a Mizoram champion ṭuma captain Zico Zoremsanga chuan goal khungna remchang a nei a, mahse, Gokulam tana si ban nghaktu Zothanmawia a paltlang thei lo - Mizo keeper ṭha hi Gokulam tan a che ṭha takzet a, Kerala club-in an chak chhana lawmthu hrilh tur an neih zinga mi a ni.