Djokovic-a'n minute 83 chauh mamawh

Novak Djokovic chuan a hma a ding apiang a hneh zel. Serbian star hian world number 66 Ricardas Berankis chu darkar khat leh minute 23 chhung leka hnehin French Open second round a paltlang.

Philippe-Chatrier Court a inkhelah world number 1 hian 6-1, 6-2, 6-2 in hnehna a chang, tun season Roland Garros-ah hian match hnih a khelh tawhah game 10 chauh a la hloh tihna a ni a, tumahin hmachhawn an chak lo ang.

Kum 33 mi Djokovic chuan, "Ka dinhmun a ṭha, hetiang hian ka khelh chhunzawm theih ka beisei," a ti. Zanin hian third round-ah Daniel Elahi Galan a hmachhawn leh ang, Galan hian American world number 47 Tennys Sandgren a lo hneh ve thung a ni.

Nuam sa taka Djokovic a chak lai hian Court Suzanne Lenglen lamah erawh inkhel hautak a awm. Seeded pakuana Denis Shapovalov chu world number 101 Roberto Carballes Baena nen darkar nga zet an inkhelh hnuah 7-5, 6-7 (5-7), 6-3, 3-6, 8-6 in a chak lo.

Spanish player Baena hian tun hmain French Open third round a la thleng ngai lo, a match lehpekah chuan seeded 18-na Grigor Dimitrov nen an inkhel ang. Bulgarian tlangval hian a khingpui world number 102 Andrej Martin chu 6-4, 7-6 (7-5), 6-1 in a hneh ve bawk.

Inkhel dangah Stefanos Tsitsipas, Matteo Berrettini leh Karen Khachanov te pawhin an khingpui ṭheuh an hneh. Ningani zan inkhelah hian Shapovalov bak chu player langsar zingah chak lo an awm lo.