En teh, EPL chu a lo herchhuak leh ta!: Zaninah Manchester City inlan nghal dawn

Premier League 2023-2024 season chu zanin aṭangin khelh ṭan a ni dawn. Champion lai Manchester City chuan zan dar 12:30-ah kai thar Burnley an lenchilh dawn, inkhel hmuhnawm kan hmu nghal dawn.

Nipui bazara team hrang hrang chet dan thlirin Premier League champion nih a awlsam dawn lo, chuvangin a bul ṭan fuh a pawimawh dawn hle - Citizens tan an captain hlui Vincent Kompany enkawl laka zahngaihna lantir a remchang lo ang.

Champion lai

Pep Guardiola-a'n season hmasa khan Premier League, Champions League leh FA Cup a lakpui vek a, nomawi hlu zual pathum chu season khat chhungin an chawi kim vek tihna a ni a, kuminah pawh theih ni se chuan an nomawi hi humhim vek an duh dawn.

Captain Ilkay Gundogan leh Riyad Mahrez te an chhuak a, midfielder Mateo Kovacic an la lut thung. Bernardo Silva leh Kyle Walker ten chhuak tur angin thawm an nei a, mahse coach Guardiola duh ang ngeiin an chelh thei dawn niin a lang.

Arsenal lakah an duh ang result an hmu zo lo a, chetsual chhunzawm an tum lo ang. Malpui hliam damkawr Kevin De Bruyne chuan inkhel bul a ṭan theih tawh a rinawm a, Belgian midfielder hi a inlan chuan boruak a danglam dawn.

Goal thun khawl Erling Haaland a dam ṭha, tlarhmaah Julian Alvarez nen an inkawp thei a, a mal tlat thei bawk. Community Shield an khelh dan thlir chuan Spanish manager Pep-a'n Haaland hi mal tlat tir a thlang zawk a nih pawhin a mak lo ang.

Defender thar Josko Gvardiol-a'n training a zawm pangngai tawh a, ani hian hliam tenau nei Nathan Ake a nek chhuak nghal mai thei. Ruben Dias, Walker leh John Stones te an awm bawk avangin tlarhnung lam chu a khawng ṭha leh viau tura ngaih a ni.

Man City hian Burnley leh Newcastle United nen EPL an khelh karalakah UEFA Super Cup an khelh a ngai dawn. August 16, Nilaini zanlaiah Sevilla nen an inkhel ang, match inkarah hun a tlem avangin Pep-a'n player a siksawi kual leh nghalin a rinawm.

Kompany a inpeih

Player a nih laiin Man City tan sulhnu ropui tam tak a hnutchhuah a, tunah chuan a club hmangaih hmachhawn zawnga a chet phawt a ngai dawn. Vincent Kompany hian season hmasa khan Burnley chu Championship nomawi a chawipui thei - EPL erawh thil thar ang a ni dawn.

Premier League leh a hnuai chiaha awm Championship a inthlau êm êm a, chuvangin kai thar team hi EPL team awmsa lakah chuan rin hlawh lo zawk an ni ṭhin, a bikin champion lai Citizens nen phei chuan khaikhin an rem lo.

Kompany chuan, "Team inpumkhat ṭha tak, inhmangaih tawn leh kawng tinrenga inpumkhat ṭha tlat kan ni, chuvangin tumahin min dah hniam thei lo ang," a ti a, player ṭha rual lakah pawh theihtawp chhuah turin an inpeih tih a sawi.

Belgium captain hlui chuan sawi zawmin, "Burnley ka enkawl aṭangin thla 18 vel chauh a la liam, a bul kan ṭan tirh kha chuan mi rin kan hlawh lo. Mahse, eng nge kan tih theih chu chiang takin kan lantir.

"Season hmasa ai khan ka naute hian inrintawkna an nei sang zual tawh hle, kawng hrang hrangin nasa takin hma an sawn bawk. Kan league match pangaah kan chak a nih chuan a aia nasa zawkin kan chak thei tih ka hrilh ang a, a hmasa pangaah kan chak lo a nih pawhin tho chhuak turin chakna kan neih thu ka hrilh ang," tiin a naute chu engmah hlau lo turin a chah.

Burnley tan Man City hneh tur chuan thil mak tih a ngai dawn, an intawn hnuhnung 11-ah Man City an chak vek; match 16 chinah pawh Burnley hian chak ni hmel an hmu ve lo, zaninah chuan fans phurna sang tak nen point khat tal hmuh an tum ang.

Hun pek belh dan thar

Premier League season thar aṭang hian inkhelh tawpa hun pek belh chungchangah inkaihhruaina dan thar hman a ni dawn. EPL thuneitu lamin an thil tih tur hi International Football Association Board (IFAB) lamin an ruahmanna tihlawhtling tura an nawrna vang a ni.

Player hliam vanga hun khawhral, goal khung lawm chhung leh thil dang vanga inkhelh chawlh lailawkna zawng zawng chu chhinchhiah vek a ni dawn a, heng an chawlh chhung zawng hi a tawpah pek belh leh ṭhin a ni ang.

Qatar World Cup-ah khan he dan hi hman a lo ni tawh, a tlangpui thuin minute 90 a tlin hnuah minute 10 vel bawr pek belh a ngai ṭhin. World Cup-ah khan chawhrualin minute 10 leh second 11 zel pek belh ang a ni phak.

English football inelna hniam zawkten season thar an ṭan tawh a, dan thar hi hman a ni tawh. Kartawpa Community Shield an khelh pawh khan hman a ni tawh. Wembley Stadium-a inkhelah khan Arsenal lamin hun pek belh minute 11-naah si phurh an sut chauh a ni.

Hun pek belh a tam dawn tak avangin player-te an hah sawt dawn tihna a ni a, dan thar hman tur hi Manchester United defender Raphael Varane leh Manchester City midfielder Kevin de Bruyne te chuan an duh loh thu an lo sawi chhuak tawh a ni.

Hun pek belh chauh a ni lo a, an duh loh zawnga thutlukna an siam avanga referee hual tuau tuau leh technical area lama coach che uchuak deuhte chuan hremna na zawk an hmachhawn thei tawh dawn bawk.