Chelsea captain thar Reece James

Mauricio Pochettino chuan Chelsea captain thar a ruat a, an academy aṭanga inzir chuak Reece James chuan season thar aṭangin captain armband a hreng dawn, kum 24 mi chauh ni chungin hruaitu nihna a chelh dawn a ni.

January thla khan Blues vice captain Jorginho chuan Arsenal a zawm a, tun nipui bazar chhungin captain Cesar Azpilicueta a chhuak leh bawk. Senior player chhuak an tam avangin hruaitu thar an mamawh.

Season thar inbuatsaihna an neih lai khan Thiago Silva, Reece James, Trevoh Chalobah leh Ben Chilwell te chuan vawi khat ṭheuh captain armband hi an hreng vek a, coach thar Poch-a'n tunah chuan thutlukna a siam ta a ni.

Chelsea captain thar James chuan, "Hetiang mawhphurhna leh chanvo ka chelh thei hi ka lawm hle, player ropui tak tak ten an lo chelh tawh a nih avangin a huphurhawm a, chutihrualin ka phur takzet bawk.

"Chelsea hi ka hun tam zawk hmanna hmun a ni a, kum ruk mi chauh ka nih laiin academy ka zawm. Hun rei tak awm tawh mah ila kei leh ka chhungte tan chuan captain meuh nih chu thil lawmawm tak a ni," tiin a sawi.

James hian Blues tan inelna hrang hrangah match 147 a khel tawh a, goal 11 a khungsak tawh. Champions League, UEFA Super Cup leh FIFA Club World Cup te a lakpui tawh bawk.

Blues coach Pochettino chuan, "Thutlukna hi kei leh club siam a ni a, captain atana Reece kan ruat thei hi a lawmawm kan ti hle. Pre season kan hman lai khan player dangte tana entawn tlak leh hruaitu ṭha a nihna a lantir tawh.

"Chelsea hi eng hmuna hruai thlen tur nge tih a hrechiang," a ti. Sporting director Paul Winstanley leh Laurence Stewart te pawhin an captain thar lakah rinna an nghah thu leh beisei an neih san thu an sawi ve bawk.

Premier League season thara an match hmasa ber atan Chelsea hian Pathianni zanah Liverpool an mikhual ang.