Champion tum manager pasarih

Football ngainaitute nghahhlelh Premier League chu zanin aṭangin khelh ṭan a ni dawn. Newcastle United-in neitu thar an neih hnuah nasa takin an insiam ṭha a, Champions League an khel dawn. Team ṭha zingah Magpies an awm ve tak avangin 'Big 6' tih hi a fuh chiah tawh loin a lang a, 'Big 7' a tih theih ta zawk.

Champion thei team pasarih an awm angin a sawi theih a, chutihrualin champion tura rin ngam erawh an tam lo. BBC pundit mi 26 aṭangin England hmeichhe striker hlui Ellen White chiahin Arsenal champion a ring a, a bak zawngin Manchester City champion an ring vek. Hei hi mi nawlpui rin dan pawh a nih a rinawm.

A sang palia tel thei turah Man City leh Arsenal bakah Manchester United, Liverpool, Chelsea leh Newcastle United te an ring hlawm. Unai Emery enkawl Aston Villa ring pahnih an awm laiin Tottenham Hotspur hming a lang pha lo. Striker chhuanvawr Harry Kane chu chhuak thei dinhmunah a ding a, English striker awm dan tur hian Spurs hma hun thui takin a hril thei.

Club lian pasarih enkawltu zingah Newcastle United manager Eddie Howe chauh English a awm. Season liam taa champion tuma inum pahnih Mikel Arteta leh Pep Guardiola te hi Spanish ve ve an ni a; Argentina (Mauricio Pochettino), Germany (Jürgen Klopp), Netherlands (Erik ten Hag) leh Australia (Ange Postecoglou) aṭangin manager pakhat ṭheuh an awm bawk.

Nomawi chawi tum manager pasarihte hi ram paruk aṭanga thlanchhuah an ni a, an tawnhriat leh an team enkawl dan inang lo mah se an tum erawh a thu hmun - Premier League champion tum vek an ni. Guardiola leh Klopp ten EPL nomawi an chawi tawh a, manager dang panga tan thil thar a ni thung ang.