FIFA Women's World Cup - Quarterfinal a thleng ta

Australia leh New Zealand-in an inthlen ṭawm FIFA Women's World Cup 2023 pawh a hmawr bawk a hnai zel a, vawiinah quarterfinal khelh a ni dawn ta - zing dar 6:30-ah Spain leh Netherlands an inkhel ang a, chawhnu dar 1:00-ah Japan leh Sweden an inkhel ang.

Inelna thlengtu pakhat zawk New Zealand-in an match hmasa berah hnehna chang mah se, group stage paltlang zo loin inelna an mangṭha a, hetihlai hian Australia erawh a thiam pariat zingah an tel.

A zawna vawi hnih champion lai USA pawhin last 16 paltlang zo loin World Cup an mangṭha a, Australia bakah Spain, Netherlands, Japan, Sweden, France, England leh Colombia te chu quarterfinal lut dang an ni.

Quarterfinal lut zinga champion tawh awmchhun chu Japan an ni a, ram dang zawng hian world champion nih awmzia an la hre lo. A tawi zawnga sawi chuan, champion thar hmu turin chance a sang hle.

Spain tan beiseina

Vawiinah quarterfinal match hnih khelh a ni dawn a, zing dar 6:30 hian Spain leh Netherlands an intawng ang - Spain tan World Cup-a quarterfinal an khelh hmasak ber a ni a, Netherlands erawhin World Cup 2019 final an khel thung.

Chenna ngai loh ram fangin Spain-in hnehna chan ngei an tum dawn a, Netherlands hneh turin an ṭha tawk ang em, tih erawh zawhna awm thei tak a ni. La Roja hian group stage-ah Costa Rica (3-0) leh Zambia (5-0) an sawp thei a, mahse, Japan laka 5-0 ngawta an tlawm khan ngaihtuahna a ti thui.

Chutihrual chuan he team hian an 'mood' fuh ni chuan goal an khung nual thei tih last 16-ah an pholang nawn a, group A hmahruaitu ni chunga last 16 lut Switzerland chu 5-1 ngawta sawpin an pet chhuak. Champion tum

Netherlands

Netherlands-in round of 16 lut turin harsatna an tawk lo - Portugal (1-0) an hneh hnuah USA (1-1) an inhnehtawkpui a, group stage match tawp berah Vietnam chu 7-0 ngawtin an sawp bawk.

Dutch hmeichhe team hian last 16-ah harsatna nei loin South Africa chu 2-0 in an hneh zui a, quarterfinal an luh hnu lawkah Netherlands manager Andries Jonker chuan, "Tupawh kan hneh thei tih inpawm thlap chungin World Cup hi kan pan," a ti ngam ngat.

World Cup 2019 final-a an chak loh khan Jonker hian Dutch team hi a la enkawl lo. August 2022 aṭang khan enkawl ṭan ve chauhin, match 14 a enkawl tawhah vawi thum chiah a la tlawmpui - vawi 10 hnehna a chanpui thei.

Barcelona leh Bayern Munich assistant coach hlui hian a thil sawiah a ti tak tak ang, tih a chiang a, mahse, a hna hmasa erawh vawiina Spain hneh phawt a ni.

Hei le Japan

Kum 2011 khan Japan-in chhiatna rapthlak tak an tuar. Lirnghing leh tsunami vangin mi 18,000 chuangin an nunna an chân a, mi tam takin chenna in pawh an nei lo a, J-village an tih, Japan football team-te hmunpui pawh in leh lo chânten khawsak nan an hmang.

Mahse, chutiang taka chhiatna rapthlakin an ram a nuai hnu lawkah chuan Japan-in nui hmel an pu ve leh - a chhan maw? Hmeichhe World Cup-ah an champion tlat alawm! A hnu kum liah final lut nawn mah se, USA an ngam lo thung.

Japan-in an thawnthu ngaihnawm kha an la hre reng a, tun ṭum World Cup-ah champion leh an tum - chumi tur chuan squad an nei ṭha tawk bawk. Japan hian tun inelnaah goal 14 ngawt khungin, an lamah goal khat chiah a la lut thung.

Mahse, vawiina an hmachhawn tur Sweden hi last 16 aṭanga USA pet tlatu an nih avangin an inringtawk hle ang tih a chiang a, Japan tan hnehna chang turin, tun inelnaa goal nga khunga top scorer ni mek Hinata Miyazawa khelh ṭhat a ṭul ang.

Sweden an ṭha

World Cup-ah Sweden la champion lo mah se, engtiklai mahin zuamawm an ni ngai lo - vawi thum chu pathumna dinhmun an luah tawh a, kum 2003 khan final lutin USA an ngam lo bawk.

Kum 1991 aṭanga khelh ṭan FIFA Women's World Cup-ah hian Sweden hi an la inlan vek a, ṭum khat group stage an paltlang lo tih loh chu knockout round an la lut vek - USA hneh hlim an nih avangin an inringtawk bawk ang.

Sweden-in USA an pet chhuah theih nan goalkeeper Zecira Musovic chu player ṭangkai a ni a, vawiinah pawh hnehna an chan dawn chuan Chelsea goalkeeper hian rin tlak a nihzia a pholan nawn a ṭul ang.

Group stage paltlang turin Sweden hian match thum an khelhah hnehna an chang vek tih hriat a ṭha a, South Africa (2-1) bakah Italy (5-0) leh Argentina (2-0) chu harsatna nei loin an paltlang - Japan hneh an tum ngam ang.