Toronto-ah Alcaraz a chak

Carlos Alcaraz chuan nimin zing khan Canadian Open 2023 atana a match hmasa ber a khel a, world number 1 hian a khingpui Ben Shelton chu 6-3, 7-6 (7/3) a hnehin last 16 a inhlangkai.

Tun hnaiah Alcaraz a khel ṭha tluang viau a, mimal inelna a hmachhawn bikah chuan a match hnuhnung 13-ah a chak vek. Queen's Club leh Wimbledon title a la a, tun inelna khelh laiah pawh rinkai a ni mek.

Seeded pakhatna Alcaraz chuan, "A ṭha thei ang bera khelh chhuah ka tum a, mahse a harsa khawp mai. A nihna takah chuan a tir aṭanga a tawp thleng khan kei aiin a ball nawr a na zawk a, a harsa takzet a ni.

"Tun hma lama player dangte pawhin an sawi tawh ang khan, tournament khelh chuan match hmasa ber hi chu a harsa deuh ṭhin a ni. Tun match aṭang hian thil tam tak ka zir chhuak a, a lehpek atan ka chhawr ṭangkai ngei pawh ka beisei," a ti.

Spanish tlangval Alcaraz hian a match lehpekah chuan Hubert Hurkacz a tum dawn, Polish tlangval hi tunlai player hmuhnawm zinga mi a nih phak avangin awlsam taka paltlang ngawt theih a ni dawn lo, inkhel a hmuhnawm ang.

Andy Murray pawhin last 16 a lut. British tlangval hian Max Purcell chu 7-6 (7/2), 3-6, 7-5 in a hneh a, quarterfinal lut tur chuan seeded pasarihna Jannik Sinner a paltlang leh a ngai dawn a ni.

Grand Slam vawi thum champion tawh Murray hi set hnuhnung berah hian dinhmun ṭha lo zawkah a ṭang hman, mahse huaisen taka tho chhuak lehin a chak, hnehna chang tur hian darkar thum deuh thaw hun a mamawh.

World number 1 hlui Murray-a hmachhawn leh tur Sinner hian inkhel dangah, amah ang bawka Italian tlangval Matteo Berrettini chu 6-4, 6-3 in a hneh, a khingpuiin a service chhuhsak theihna remchang vawi sarih a hmuh chu a inchhanhim vek a ni.

Inkhel dangah Alexander Zverev erawh a chak lo. German tlangval hian a service vawi li ngawt a hloh avangin Alejandro Davidovich Fokina nen darkar khat leh minute hnih an inkhelh hnuah 6-1, 6-2 in a chak lo zawkah a ṭang.

American tlangval, qualifying paltlang chunga inlan Marcos Giron chuan world number 6 Holger Rune chu 6-2, 4-6, 6-3 in a hneh a, tennis a khelh hun chhunga hnehna a chan ropui ber a la ni. Gabriel Diallo chu Alex de Minaur lakah 6-4, 7-5 in a chak lo ve bawk.