August 25 aṭangin World Cup ticket zuar dawn

International Cricket Council (ICC) leh Board of Control for Cricket in India (BCCI) te chuan ICC Men's World Cup 2023 ticket chu August 25, Zirtawpni aṭanga an zawrh ṭan tur thu an puang.

Ticket an zawrh hmasak turah hian India inkhel a la tel dawn lo a, inkhel dang zawng leh warm up en theihnate zawrh hmasak tur a ni.

Kumin ODI Cricket World Cup hi India-in a thleng dawn a, October 5, Ningani aṭanga ṭan tur niin ram 10 an tel dawn. Ticket lei turte hi August 15, Thawhlehni aṭangin 'cricketworldcup.com/register' ah an inziaklut ṭan thei ang.

World Cup website-a inziaklutte hian chanchinthar an hre hmasa ang a, World Cup ticket an chan theihna kawng a inhawn zau phah dawn.

Khawvel hmuh châk India leh Pakistan inkhel tur chu October 15-a khelh tura ruahman ni zet mah se ICC lamin October 14, Inrinniah an sawn. Hei vang hian Delhi-a England leh Afghanistan inkhel tur chu October 15, Pathianniah sawn a ni thung.