Luton Town-in Barkley an la lut

Premier League kai thar Luton Town chuan free transfer-in Ross Barkley an la lut. English midfielder hi June thla khan OGC Nice-a a contract neih lai a zo a, French club hian an pawhsei sak loh avangin club a nei lo.

Luton manager Rob Edwards chuan, "Danglamna thlen thei tur player a ni," tiin a sawi. Kum 29 mi Barkley hian Everton aṭanga hming rawn chher ṭanin Chelsea-in January 2018 khan pound maktaduai 15-in an la lut.

Stamford Bridge-ah Barkley a che ṭha tawk lo a, Aston Villa-ah loan hmangin a chhuak a; season liam ta khan Ligue 1 club Nice a zawm.

Barkley hian Premier League-ah tawnhriat ṭha tak a nei a, England tan vawi 33 ngawt a inlan tawh avangin a tawnhriat hi a pawimawh pha ang.

Everton leh Chelsea midfielder hlui Barkley chuan, "Ka kum a la naupang a, tun hnaiah ka duh angin ka khel tam tawk lo. Ka taksa ka inenkawl uluk avangin tha ka la ngah a, inkhel turin ka inpeih a ni," tiin a sawi.