Wolves boss thar Gary O'Neil

Premier League club Wolverhampton Wanderers chuan coach Julen Lopetegui nen an inṭhen thu an puan hnu lawkah coach thar an neih thu an puang leh nghal a, Bournemouth boss hlui Gary O'Neil chu an coach ni turin kum thum chhung atan contract an ziahpui.

Wolves hian Lopetegui nen season bul an ṭan dawn emaw tih laiin, Premier League club hian Spanish coach duhnate an tihlawhtling thei lo a, tun nipuiah transfer bazar-a sum hman tur an neih loh avangin Lopetegui a chhuak.

Lopetegui-a'n chhuah a tum hnuah Wolves hian an la chelh rih a, coach an zawn chhung nghak turin an ngen. Real Madrid boss hlui hian an ngen angin a nghak a, a chhuah hnu lawkah O'Neil lakluh thu puan a ni ta.

Wolves sporting director Matt Hobbs chuan, "Gary hi coach naupang tha tho tak, tum dan nghet tak nei mi a ni. Tun hi British coach beiseiawm tak nena chona thar hmachhawn ho hun a ni a, mi hrang hrang kan kawm kual hnuah pawh Gary hian min hneh ber a ni," a ti.

Kum 40 mi O'Neil hian season hman zawh takah khan Bournemouth chu 15-na a nihpui a, mahse, June 19 khan Cherries hian an coach aṭangin an ban. Wolves nen an thawk dun dawn ta a, a hna erawh a hautak nghal dawn hle.

Wolves hian August 14, Thawhṭanni zanah season thar atana an match hmasa ber an khel dawn a, Old Trafford-ah Manchester United an lenchilh dawn - O'Neil tan beiseina tihsan nghal viau a harsa mai thei!

Hobbs chuan, "Thil a duh ulukin a duhtui êm êm a, player ṭha tak tak a lo chherchhuah tawhna hian min hip hle bawk. Player naupang deuh leh tawnhriat nei ṭha thlengin a enkawl tawh a, nikuma kan inhmachhawn ṭuma a team khelh dante en pawhin, ani leh a staff te hi an thawkrim hle tih a hriat theih.

"Hmalam pan duh mi, hmasawn duh a ni a, Bournemouth-a a hnathawh ṭha tak pawh kan hre vek a ni," a ti a, coach dang tam tak an be chunga O'Neil an thlan chhan a sawi.

O'Neil hian August 2020 khan coaching lama a hna hmasa ber chelh ṭanin, Liverpool Under-23 team-ah assistant coach a ni a, February 2021 khan Cherries boss Jonathan Woodgate-a staff zinga tel turin Bournemouth a zawm.

August 2022 khan Cherries hian Liverpool chu 9-0 ngawtin an ngam lo a, coach Scott Parker chu ban niin, O'Neil hi coach lailawk atan ruat zui a ni. November-ah coach nghet ni turin contract a ziak a, kum khat leh a chanve enkawl turin an inrem - thla 12 dang pawhsei theih a ni.

Bournemouth hi match 37 a kaihhruaiah vawi 11 chakpuiin, vawi ruk an in-draw a, vawi 20 an tlawm. Club budget leh player neih dan thlirin hna ṭha pangngai tak a thawk angah a ngaih theih a, mahse, rin loh taka ban niin, Wolves lawmah a lo tla.

Wolves chhuahsan ta Lopetegui khan Premier League club hi match 27 a kaihruai hman a, vawi 10 hnehna chanpuiin, vawi ruk draw a nei a, vawi 11 an tlawm thung.