Ronaldo hoin Al-Nassr an tlang

Hun tawp dawn lama Cristiano Ronaldo-a penalty chhuih luh hmangin Al-Nassr chuan Al-Shorta 1-0 in an hneh a, a vawi khat nan Arab Club Champions Cup final an lut.

Semifinal lehlamah Al-Hilal an tlang ve bawk a, team pahnih hian August 12, Inrinni zan dar 12:30 hian final an khel ang - Ronaldo tan Saudi Arabian club a zawm hnua nomawi hmasa ber chawi turin match khat chak a la ngai.

Nilaini zan inkhelah Al Nassr hian hun tam zawk chu an thunun, mahse goal khung erawh an harsat tlat. Saudi Pro League club tan Ronaldo-a'n goal khung mah se offside vanga hnawlsak a ni a, Iraqi club Al-Shorta an la him phawt.

Second half minute 75-naah Sadio Mane chuan Al Shorta tlarhnung a paltlang a, an lo titlu. A tirah penalty pe nghal mai lo mah se VAR hmanga ennawn a nih hnuah penalty pek an ni a, a pettu Ronaldo-a'n a khung chiang hle.

Arab Club Champions Cup-ah hian Ronaldo-a'n match li a khelh aṭangin goal li a khung tawh a, a tan season thar bul ṭanna duhawm tak a ni. Inrinni zana final an khelh bakah hian Thawhṭanni zan aṭangin Saudi Pro League an khel ṭan nghal ang.