Ole leh Jose-ten khelmual pawnah an ṭan tawh Pathianni zanah United Vs Spurs

Premier League-ah manager leh player langsar an tam a, season ṭan phat aṭangin khelmual pawn leh chhungah boruak a nung nghal hle. Pathianni zan dar 9:00 hian Old Trafford-ah Manchester United leh Tottenham Hotspur te an inkhel dawn a, manager pahnih Ole Gunnar Solskjaer leh Jose Mourinho te chuan khelmual pawn lamah inbeihna an ṭan der tawh.

Manchester United-in kar hmasa khan Brighton & Hove Albion 3-0 in an hneh hram a, Seagulls hian vawi nga zet woodwork an pet per. Inkhelh banah Solskjaer chuan, "Goal len zawng teh tura Mourinho awm lo chu a vanneihthlak hle," tiin Spurs boss a kap.

Tottenham hian Macedonian club Shkendija an hneh ṭumin inkhelh hmain Mourinho-a'n goal zau zawng a ringhlel a, a sawisel. Thuneituten an teh ṭhat hnuah 5 cm-in a san zawng  leh sei zawngah a tling lo.

Solskjaer-a'n 'an' chungchang a sawi tih a hriatin Portuguese manager ngawih mai a tum lo. Mourinho chuan, "Solskjaer hian goal len zawng hi a ngaih pawimawh tak tak ka ring lo, penalty box a dah pawimawh zawk ang. Ani hi chuan 18 yard box ni loin 22 yard box ni se a duh ang," tiin Norwegian manager chu a kap let a, Spurs boss hian Man United-in penalty an hmuh theihna lai tak chu a kah let nan hian a hmang.

Premier League zawhah Carabao Cup an khel a, Manchester United-in Brighton bawk hmachhawnin 3-0 in an hneh. Tottenham pawhin an khingpui Chelsea chu penalty shootout-ah an hneh a, hemi hma hian Leyton Orient chu inkhel loin an hneh. League Two club player-te hi Covid-19 positive an tam avangin an inkhel thei lo.

Solskjaer chuan, "Kan ngaih pawimawh dan a zir a ni khawp mai. Tun round thleng pawh hian team ṭhenkhat chu khel loin an la tlang chu a nia," tiin League Cup chungchang an zawhnaah ṭul lo takin Spurs chungchang a sawi lang.

Manchester United manager Ole Gunnar Solskjaer-a'n ṭul loah Jose Mourinho a cho chhuak a, media hmaa inbeihna a nih avangin Norwegian manager hian a hneh loh tur a choah a ngaih theih. Nimin tlai press conference-ah erawh Solskjaer a inhmu chhuak niin a lang a, Mourinho nena an inbeihna tihtawp a duh.

United boss chuan, "Kan hun tawn hi a danglam a, a chang hi chuan fiamthu han thawh ve zawk te hi a ṭul ṭhin. Rilru thianghlim takin kan infiam a, Mourinho hi chu coach ngainatawm tak a ni. Kawm a nuam em em a, chak a duh bawk. Football tana a hnathawh avangin ka zah em em a ni," tiin Mourinho chungchang a sawi.

Tottenham hian Ningani zan khan Europa League playoff-ah Maccabi Haifa 7-2 in an sawp a, London club tan hian Harry Kane-a'n hattrick siamin Giovani Lo Celso-a'n goal hnih a khung a, Lucas Moura leh Dele Alli (penalty) ten goal khat ve ve an khung. Spurs hian Premier League match inkarah League Cup leh Europa League playoff an khel a, Mourinho-a'n player-te chhan a ti na hle.

Mourinho chuan, "Gareth South-gate (England manager) leh Steve Holland (assistant) te ka tiam duh chu Harry Kane hi season tawp hmain minute khat pawh friendly match ka khelhtir lo ang," tiin a sawi. England-in Wales nen friendly match an khelh turah Spurs striker Kane hi awl se a duh thu a sawi a, Portuguese manager leh Southgate-a te buaina a inṭan ang.

Man United-in an match hnuhnung paliah Spurs hi vawi khat an hneh lo a, an intawn hnuhnung berah kumin June thla khan 1-1 in an inhnehtawk. Hemi ṭum hian Spurs player thar Steven Bergwijn-a'n goal a khung a, David de Gea-a'n nasa taka sawiselna a tawh phah.

Tun ṭumah hian De Gea bawk a inlan a rinawm a, chutihrualin League Cup a che ṭha Dean Henderson-a'n Spanish keeper hi pressure a pe ve reng. Nimin tlai press conference-ah Solskjaer-a'n Harry Maguire a dam tawh thu a sawi a, United tan chanchin lawmawm a ni. Chutihrualin League Cup-ah Donny Van de Beek leh Juan Mata te an khel ṭha a, United tana bul ṭan turte hriat a châkawm hle.

Spurs player pawimawh Son Heung-min chu hliam vangin a dinhmun a chiang lo a, South Korean forward hi match hnuhnung pahnihah a inlan lo. Spurs-in Maccabi Haifa an hneh ṭumin hliam vangin Giovani Lo Celso thlak a ngai a, ani pawh United hmachhawn turin a dinhmun a chiang lo.

Gareth Bale-a'n training zawm tawh mah se chhawr theih tur khawpin a la inpeih lo ang. Jose Mourinho hote hi an ṭhat theih dan berin an inlan thei dawn lo a, Man United pawh transfer boruakin a la tibuai ve reng. Team pahnihin khelmual pawnah harsatna nei ve ve mah se point thum a pawimawh hmasa a, chhuanlam neih a thiang lo.