Barcelona an hmuhnawm chhunzawm zel

Spanish La Liga lamah Barcelona 'thar' kan hmuh chhunzawm zel a, Catalan club hian Ningani zan khan an mikhualna ramah Celta Vigo chu 3-0 in an hneh.

Barcelona tan rawlthar duhawm Ansu Fati chuan Lionel Messi chawlh hunah pawh lungphanna tur a awm dawn lo tih pholangin goal a khung leh ta a, Lucas Olaza (own goal) leh Sergi Roberto-ten goal khat ve ve an khung bawk. 

Ronald Koeman enkawlna hnuaiah Barcelona-in league match hnih khel tawhin hnehna an la chang ve ve a, goal sarih ngawt khung tawhin an lamah goal a la lut lo thung. 

Barcelona hian Pathianni zan dar 12:30-ah an league match thumna an khelh chhunzawm leh nghal dawn a, Nou Camp-ah team ṭha Sevilla an mikhual ang. 

Celta khelmualah Fati bawk a inlar a, kum 17 mi forward hian hartharna chang Philippe Coutinho siamsak chu minute 11-na lekah goal-ah a chantir a, Barcelona player zinga kum 17 mi lek nichunga La Liga a goal 10 khung tling thei pahnihna a ni. 

Fati hma hian Barcelona rawlthar beiseiawm ni ṭhin Bojan Krkic chuan kum 18 a tlin hmain Catalan club tan hian La Liga-ah goal 10 a lo khung tling tawh a, Krkic-a hnung a zui.

Hetihrual hian Fati tan inchhuan viau hun erawh a la ni lo - record a nihrual Krkic pawh hi a hunlai kha chuan European football nghawr nghing khawpin chanchin a nei a, beisei anga a chet ṭhat zui loh avangin Spain tan pawh vawi khat chiah a inlan hman. 

Fati hian La Liga goal 10 khung tling tur hian league match 26 chauh a mamawh a, Messi-a'n Barcelona tana league goal 10 khung tura match a mamawh zat chu match 30 a ni.  

Minute 42-naah Barcelona an kim lo a, defender Clement Lenglet chu a yellow card pahnihna a hmuh avangin hnawhchhuah a ni. Player kim loa khel Barca dinhmun a derthawng. 

Mahse, khelmual pawn lam thlenga buaina tam tak nei Barcelona-in an buaina te an theihnghilh ṭan tih pholangin huaisen takin an khelh chhunzawm a, minute 51-naah an goal hnihna an hlawh chhuak. 

Match hmasa zawka penalty aṭanga goal khungtu Messi ball cross chu Celta defender Lucas Olaza chuan an lamah a ti lut a, Argentine forward-in goal khung lo mah se a khel ṭha takzet. 

Player 10 a an khel chungin Barcelona an zuai duh lo. Minute 90 a pel tawh a, an chak dawn tih a chiang tawh. Mahse, Catalan club tan Sergi Roberto a inlar ve leh a, hun pek belh minute nganaah chak nemnghehna goal a khung. 

Pathianni zanah Barcelona an inlan lehnghal dawn a, zanin dar 7:30 hian an elpui zinga mi ni leh tur Atletico Madrid an inlan dawn bawk. Luis Suarez khelhna team hian Villarreal an mikhual ang. 

Atletico Madrid hian tun season a an match hmasa berah 6-1 ngawtin Granada sawp mah se an match hnihnaah Huesca chu goal khung loin an inhnehtawkpui a, Diego Simeone enkawl team hian Barca leh Real el leh an duh chuan insiamṭhat ran an mamawh. 

Hetihrual hian league match thum an khelh tawh chinah champion lai Real Madrid fakna tur a la tlem rih hle a, Zinedine Zidane-a naute pawh hian Pathianni zan dar 7:30-ah Levante an lenchilh ang. 

Real Madrid hian tun season a match thum an khelh tawh aṭangin point sarih an nei a, Real Sociedad lakah goal an khung loh laiin Real Betis (3-2) leh Real Valladolid (1-0) an hneh hram - Barcelona insiamṭha chho mek hi hmuh nuam an ti kherin a rinawm loh.