Vawiinah GIG Motors I Day Football Semifinal : Dar 11:00-ah 2022 I Day Football final rematch

I Day Football-ah champion lai Mizoram Police-in Chhinga Veng an hneh loh avangin an group-ah pakhatna dinhmun an luah thei lo a, tun inelnaa la khel ṭha ber Aizawl FC an hmachhawn dawn avangin final kalkawng a harsa dawn.

MPL club ṭha pahnih hi nikum I Day Football final-ah khan an inhmachhawn a, 2022 final rematch hi vawiin chawhma dar 11:00 hian RG Stadium-ah khelh a ni dawn. Zonet Zawlbuk leh YouTube channel-ah live a ni ang.

Hmatawng hriam

Aizawl FC tlarhmaah goal khung thei ṭhiau player an awm a, Lalrinzuala'n club thar tan bul a ṭan ṭha. Serchhip tlangval Rinzuala hian match tinah goal a khung a, goal li a khung zingah goal mawi bik 'bicyle kick goal' thlengin a awm.

Rinzuala thlawp tur hian coach Victor Lalbiakmawia'n Rinzuala duh thlan tur a ngah. FC Venghnuai laka hattrick siamtu R. Lalthanmawia (Amawia) chu thlan ngei tura ngaih a ni a; winger rintlak R. Ramdinthara, goal hnih khung tawh Augustine Lalrochana leh player thawkrim Lalbiakdika (BD-a) te aṭangin pakhat thlan a ngai dawn.

Lalramsanga leh K. Lalrinfela te an awm avangin midfield hi Aizawl FC chakna a ni a, tlarhnung laiah off season hmang ṭha Lalmuanawma (Munez) leh Rohmingthanga te an khawng ṭha bawk. Mahse, defence sir lam hi duhthusam a ni lo!

Police nge nge

Mizoram Police erawhin danglamna deuh an nei a, tualchhung football hi an ngam hrim hrim. Tun hma zawngin Police hi tehfung atana hman ber an ni a, tun hnaiah erawh Aizawl FC hi tehfung atan hman an ni ta zawk.

Police hi an hniam zawk tihna a ni lo a, an player thlir phei chuan tawnhriat an ngah zawk. Forward leh midfield-ah phei chuan Mizoram innghahna ni tawh hlir an ni hlawm a, tlarhmaah Malsawmfela rit deuh mah se a la ṭha reng.

Mual sira Sawmfela thlawptute hi captain Lalfakzuala leh Lalbiakhlua (Biaktea) te an ni a, Aizawl FC lamin mual sir an ven ṭhat a ṭul dawn. Midfield battle pawh hmuhnawm tura ngaih a ni a, R. Malsawmtluanga leh H. Lalbiakthanga te hi an vanglai pel hret tawh mah se AFC midfielder ṭha rual el thei ber tur an ni.

Police hi an famkim bik lo. Goal 10 zet khung mah se goal sarih zet an chhuah a, tlarhnung an tiphui lo a nih chuan semifinal chinah chuan a pawi thei ang. Goalkeeper tawnhriat nei ṭha F. Lalmuanawma a dam tawh a nih erawh chuan Police hi penalty shootout cho tur zawk an ni.