Tlai dar 2:00-ah Sanga Vs Mala

I Day Football semifinal hnuhnung zawkah Chhinga Veng FC leh Chanmari FC te chawhnu dar 2:00-ah an inkhel dawn a, RG Stadium-a inkhel tur hi coach ṭha inbeihna tiin a sawi thei bawk.

Chhinga Veng coach Lalsangzuala Hmar hi MPL-a champion ngun ber coach a ni a, Chanmari FC coach K. Malsawmkima hian National Games-ah gold a lak tawh bakah I League-a Aizawl FC kaipuitu a ni.

Sanga hian season liam ta khan MPL-ah Chawnpui FC a champion pui a, tun season-ah Chhinga Vengah kirin team thar ṭha tak a din. Chhingcows hian MS Dawngliana an la kir a, Bawngkawn striker hian goal nga khung tawhin top scorer a ni mek.

Chhinga Veng hian Dawngtea leh goalkeeper RS Lallawmzuala kawl mah se player dang erawh MPL-a hming langsar ni pha an awm meuh lo. Chuti chung chuan Sanga hian a player neih angte thiam takin a rem a, group stage match thum lek aṭangin goal 11 an khung.

Season liam taa FC Bethlehema khelhna hmun chang tam lo Suanngaihmuana chu Chhingcows hmatawngah player pawimawh a ni a, BVT rawlthar Amuana hian Mizoram Police tlarhnung pawh a chhaih buai hneh hle. Serchhip tlangval Johny Lalrinchhana'n match tinah goal a la khung a, Chhingcows midfielder Johny hi a kawppui Lalnunzira nen an hmuhnawm ṭhin.

Chanmari FC erawh I Day Football-ah chak loin bul an ṭan a, vannei taka FC Venghnuai hnuah chiang takin Electric Veng FC an hneh. Coach K. Malsawmkima hoten hma an sawn zel a, group stage-a player an siksawi kual dan aṭangin an ṭhat dan tur player an hre ṭana ngaih a ni.

CYMA Football 2023-a hming chher Vincent Lalduhawma'n khelhna chance a pek hmasak berah goal hnih a khung nghal a; midfielder Lalthangliana (AB-a) leh Felix Lalruatsanga te hi tun season-a hming chher tura ngaih an ni. Season liam taa Chawnpui champion puitu Laltlanzova pawh a insiamrem ṭan a, group match hnuhnung berah goal a khung ta. Chanmari hian tlarhmaah Lalkhawpuimawia an kawl tih hriat a ṭha a, an ṭhat lohna lai erawh team dang ang thoin tlarhnung a ni - match thum aṭangin goal sarih ngawt an chhuah.