Kane-a'n Spurs a hnuchhawn ta!

Harry Kane chuan kum 19 tehmeuh a awm tawhna Tottenham Hotspur a hnuchhawn ta a, champion theihna tura a ngaih Bayern Munich lam a hawi - Bavarians club nen hian nizan khan contract an ziak fel hman hial mai thei.

Spurs leh Bayern te chu Ningani zan khan an inrem tawh, kum 30 mi Kane hi pound maktaduai 86.4 man a ni dawn a, season khat chauh contract nei lai a nih bakah a kum ngaihtuah chuan a man a la tam tham hle.

England captain hian Tottenham tan inelna hrang hrangah match 435 aṭangin goal 280 a khung a, ani aia khung tam an awm lo. Thil a inher danglam thut a nih loh chuan Premier League goal khung tam ber erawh a ni thei dawn ta lo niin a lang.

EPL bikah match 320 aṭangin goal 213 a khung tawh a, English football inelna sang bera goal khung hnem ber Alan Shearer-a record khum turin goal 48 a la mamawh, record thar siam thei tura ngaih ni mah se tunah chuan nomawi hnaihna lam a hawisan.

Newcastle United legend Shearer chuan Kane-a chhuak tur chungchang hi social media lamah fiamthu nan a lo hmang. Thlawhtheihna hmaah a thlalak lem dahchawpin, caption atan, "Harry kal a hun ta e," tih a ziak.

English striker ropui Shearer tan chuan chanchin lawmawm a ni ngei ang. Kane hian league goal khung kawngah record siam rih lo mah se, an ram Three Lions tan goal 58 a khung tawh erawh midang tluk loha sang a ni tawh thung.

Kane hian mimal sulhnu ṭha leh ropui tak tak chu nei mah se nomawi a la chawi miau lo a, heivang hian mi tam takin player hlawhtling zingah an chhiar hleithei lo. Manchester City chuan 2021 khan lak tumin an lo dawr tawh, amah pawhin chhuah a duh hman.

Chhuah dilna lehkha a thehlut hial a, mahse Spurs chairman Daniel Levy-a'n a remti lo. Citizens lamin Erling Haaland an laksan ta zawk a, an tih fuh zia chu season khat chhungin nomawi pathum an chawi thei - Kane erawh a la champion lo tluang zel.

Kumin nipui bazar hun a lo thleng a, striker ṭha Kane chuan chhuahna tur kawng a zawng leh. Manchester United nen thawm an nei a, mahse Spurs chairman Levy chuan Premier League club dang hnenah hralh a phal lo niin an sawi.

Thuthar ṭhenkhatah chuan Man United hian Kane-a lakluh nana sum che vel tur hi tam an ti mah mah a, a hlawh pek ngai tur zawng zawng nen an huam lo deuh niin an sawi ve thung, kum 20 mi Rasmus Hojlund an la ta zawk.

Bayern Munich lamin thawm an nei reng a, an dawrna hmasate hnawlsak ni mah se an beidawng duh lo. Thomas Tuchel-a'n Bavarians dinthar leh turin striker ṭha an mamawh tih a hrechiang, chuvangin Kane hi neih ngei tumin sum pawh an hmang huai ta a ni.

Bayern Munich hian Bundesliga nomawi 33 zet an chawi tawh a, tun hnaiah a zawnin kum 11 an champion. Champions League title pawh paruk nei tawhin German Cup nomawi 20 an nei tling tawh bawk.

An vanduaiin an chesual viau a nih ngawt loh chuan season tharah pawh Bundesliga chu an lak leh a rinawm. Kane an nei a nih chuan UCL pawh an beisei dawn a, ram chhung inelna German Cup atan pawh rinkai ber an ni ang.