Timber-a'n inkhelh châk tawh

Arsenal defender thar Jurrien Timber chuan Premier League khelh a chak tawh tih a sawi a, vawiin tlai dar 5:00-a Nottingham Forest a mikhual hunah pawh a inlan vei ngei a beisei.

Ajax aṭanga North London pantu Timber hian Community Shield-ah Manchester City a hmachhawn nghal tawh a, player hmuhnawm zinga mi a ni nghal - coach Mikel Arteta pawhin a chungah rinna a nghat ngam tih a lang.

Netherlands international Timber chuan, "Hun rei lote chhungin North London-ah hian ka tlangnel tawh hle a, a lo awm hmasate ka chungah an ṭhain coach Mikel Arteta kaihhruaina hnuaia awm pawh a nuam.

"Training kan nei ṭha a, khelhna hmun inchuh turin elpui ka nei ṭha bawk, hengte hian player ṭha zawkah min siam ngei ang. Arsenal tana kan khel a nih chuan kan lakah beiseina pawh a sang.

"Khawvel team ṭha ber berte elphak tuin kan inbuatsaih a, ka tan pawh chona hmachhawn a nuamin Premier League khelh hlan pawh ka nghakhlel tawh hle, season tawpah khawi hmunah nge kan din tih ka la en let leh ang," a ti.

Arsenal hian Timber bakah Declan Rice leh Kai Havertz te an lalut fel tawh a, an league match hmasa berah an chhawr ngam nghal a rinawm. Goalkeeper David Raya chu Brentford aṭangin lak an la tum a, inremna an nei tawh bawk.