Transfer-ah Chelsea leh Liverpool an inbei : Khelmualah an chhunzawm dawn!

European football season a inṭan a, transfer boruak lah a ngaihnawm tawlh tawlh bawk si - tunlai boruak chu football fans tan chuan "A nuam" tia sawi mai hian a hrilhfiah ber a, kan tan hun duhawm a her chhuak leh ta!

Football khawvela league ngaihven hlawh bera chhal ngam Premier League pawh nizanah khelh ṭan a ni a, Pathianni zan dar 9:00-ah inkhel hmuhnawm bik en tur a awm nghal dawn - champion tum ngam ve ve Chelsea leh Liverpool an intawng dawn.

Khelmuala an intawn hma hauhin khelmual pawn lamah club pahnihin chanchin ngaihnawm an nei nghal a, transfer bazar-ah intihel tum ni awm takin an inlehthal zak zak.

Liverpool-in vawi thum ngawt an dawr hlawhchham Southampton midfielder Romeo Lavia chu Chelsea-in Reds ngamna aia sangin an dawr a, Reds hian Chelsea-in rei tak an lo hel tawh Brighton & Hove Albion midfielder Moises Caicedo chu pound maktaduai 111-in an dawr bawk.

A hunah tak

Liverpool-in nipui transfer-ah rin loh takin captain Jordan Henderson leh Fabinho an chân a, midfielder pahnih hmun ruak luah tur hi hual lawk an nei lo em ni chu aw, tih mai turin Reds an che muang a, Southampton rawlthar duhawm Romeo Lavia lam an hawi.

Mahse, Liverpool hian vawi thum ngawt an dawr tawh chungin an dawrna hi hnar vek a ni - a hnuhnung bera an dawrna hi £46mtd bakah a khelh ṭhat dan a zira a man la pung leh turin a ni a, mahse, Championship lama tla thla Saints chuan £50mtd aia tlawma hralh an tum lo bur.

Reds hian Alexis Mac Allister leh Dominik Szoboszlai lei mah se midfielder zingah Naby Keita, James Milner leh Alex Oxlade-Chamberlain an chân bawk a, player dang an lak theih lawk bawk si loh avangin captain thar Virgil van Dijk chuan Reds fan-te thinrimna a hriatthiam thu a sawi hial.

Liverpool legend Jamie Carragher pawhin, "Lavia hi in duh chuan lei mai ula, in duh lo a nih chuan midang dawr rawh u," tih hialin a club hlui hi a khak a, hetiang boruak karah hian Chelsea an lo lang chat!

A na asin

Chelsea hian Liverpool hel lai Lavia lam an hawi thut a, Saints rawlthar manah hian £48mtd an theh chhuak - Merseyside club aiin pound maktaduai hnihin an ngam huai a, Southampton hian £50mtd aia hniama tawlh tum lo mah se inbiakna an ṭan, nia sawi a ni.

Blues-in Liverpool hel lai an biaksak a, Jurgen Klopp leh a thawhpuite an awm mai mai bik lo. Brighton lam hawiin an pawisa bawm an hawng a, Chelsea-in rei tak an lo hel tawh Caicedo chu £111mtd-in Brighton hnenah lei an dil.

Brighton leh Liverpool te hi player man chungchangah an inrem nghal mai a, mahse nimin tlai khan Blues chuan thawm an rawn nei thar, tu zawkin nge chang dawn hriat theih a la ni rih ta mai lo. Caicedo hian London club pan a duh zawk niin an sawi.

Chelsea chuan Caicedo hi £80mtd-in an dawr tawh a, Liverpool ngamna zat nen a inthlau hle - Liverpool hi transfer inhawn tirha Jude Bellingham lei ngam lo kha an ni a, Bellingham hian £115mtd-in Real Madrid a zawm.

A hun ta e

Liverpool chief executive Billy Hogan chuan Caicedo lakluh tum hian rei tak ruahmanna a lo siam tawh nia sawi a ni a, Chelsea-in Lavia an dawr ve tak avanga Ecuador international hi dawr thut an ni hran lo.

Khelmual pawnah a dingchang zawk nih tumin team pahnih an inel a, Pathianni zanah khelmualah an intawng dawn - Chelsea -in mahni mualah khel dawn mah se, lawm lohna tur an nei a, RB Leipzig aṭanga an lakluh Christopher Nkunku chu hliam vangin a inlan thei dawn lo.

Chuti a nih chuan Villarreal aṭanga lakluh Nicolas Jackson chu bul ṭan nghal tura ngaih a ni a, tlarhnungah Wesley Fofana a inhliam bawk avangin AS Monaco aṭanga lakluh Axel Disasi hi Thiago Silva nen inkawp nghal tura beisei an ni.

Blues hian nipuiah Kalidou Koulibaly, Mateo Kovacic, Edouard Mendy, Kai Havertz, Ruben Loftus-Cheek, N'Golo Kanté, Mason Mount, César Azpilicueta leh Christian Pulisic te ho an chân a, coach thar Mauricio Pochettino hoa team thar an din dan hi hmuh a châkawm tawh hle.

Liverpool thar

Reds-in Mac Allister leh Szoboszlai an nei thar a, player pahnih hian Liverpool an zawmna a rei deuh tawh avangin Pathianni zanah bul ṭan nghal pawh ni se, a awm lo hran lo ang. Caicedo erawh la fel hman pawh ni se, inlan nan chuan a hma hret dawn.

Liverpool manager Jurgen Klopp chuan, "Liverpool thar hmangin bul kan ṭan leh dawn a, phurawm tak a ni. Kan team hi rei tak kan awm ho tawh avangin, mi tam takin thil inthlak danglam hmuh an duh a, a hunah tak kan inthlak danglam em, ka hre bik lo.

"Mahse, tunah a thleng a, a ṭha a ni mai. Hruaitu thar kan nei a, hruaitu ni kher lo player dang pawh en ila, an ṭha hle. Cody Gakpo hi a ṭha êm êm a, Szoboszlai hi kum 23 mi lek niin, Hungary captain a ni a, Macca (Allister) pawh player danglam bik a ni.

"Mawhphurhna kan nei a, chu mawhphurhna chu huai takin la ila, kan thlen chin en ang hmiang. Midang an tum a ngai lo a, keimahnia a ṭha ber hi pek mai tur a ni," a ti a, Liverpool thar an din thu a sawi.

A thar chu

Pre-season-a Liverpool buaina chu goal an la chhuah reng hi a ni a, hei hi ngaihtuahna sen a ngai. Tlarhmaah chuan Mohamed Salah, Luis Diaz, Darwin Nunez, Diogo Jota leh Gakpo an nei a, a manganthlak loh.

Tlarhnungah pawh Alisson Becker, Trent Alexander-Arnold, Virgil van Dijk, Ibrahima Konate leh Andy Robertson te intlar leh mai tura ngaih an ni a, pre-season-a defensive hna thawktu Mac Allister hian defensive midfielder hna a chelh leh mai ang em, tih chu zawhna awm a ni bawk.

Szoboszlai pawh bul ṭan tura ngaih a ni a, Curtis Jones a lut lo a nih chuan pre-season match ang thoin Gakpo hian midfield lamah hun a hmang leh thei bawk ang. Klopp chuan, "Chelsea hmachhawn tur hian rei tak kan lo inpuahchah tawh a, Caicedo boruak hian min tibuai lo ang.

"Kan tan chuan bul ṭanna hautak a ni a, mahse, kan hun ṭha neihte engmah loa chantir kan duh lo. Football khawvelah hian kum 20 chuang hun ka hmang tawh a, kan hma hun hi chiang taka sawi theih ni ngai lo mah se, theihtawp kan chhuah phawt a ṭul," a ti a, Chelsea lakah chak a tum.