Newcastle United an inpeih tawh

Champions League khel tur Newcastle United chuan zanin dar 10:00 hian Premier League match khel turin Aston Villa an mikhual dawn a, tun hnai team pahnih inthuam ṭhat dan thlirin inkhel en châkawm a ni.

Newcastle boss Eddie Howe chuan, "Kan nih dan tur takin, kan awmna tur takah kan awmin ka hria. Pre-season hautak zet kan hmachhawn a, kan khar ṭha hle bawk," a ti - Magpies hian an match hnuhnung pahnihah Fiorentina (2-0) leh Villarreal (4-0) an hneh.

Howe chuan sawi zawmin, "Tunah chuan pre-season hman zawha kan nih tur ang tak kan ni. Kan in fit a, inkhelh kan châk a, kan hmaa chona inchhawp chu nghakhlel takin kan thlir bawk," a ti a, a zam lo hle.

Magpies hian nipui transfer-ah AC Milan aṭanga midfielder Sandro Tonali la lutin £55mtd an seng a, ani bakah hian Leicester City winger Harvey Barnes (£38mtd) leh Southampton right back Tino Livramento (£35mtd) te an la lut a, Danish club Odense Boldklub aṭanga an lakluh Yankuba Minteh erawh loan hmangin an chhuahtir lehnghal.

Howe ṭawng pawr viau mah se, an hmaa ding tur Villa hi Unai Emery hoa indinthar mek an ni a, an tawh a khirh ve dawn tho. Villa hian Bayer Leverkusen aṭangin Moussa Diaby chu £51.9mtd zetin an la lut a, Villarreal aṭangin Spain international Pau Torres chu rin loh takin £31.5mtd-in an la bawk.

Hmanni lawka European club liante chil tiputtu Youri Tielemans pawh Leicester City aṭangin free transfer-in an la lut a, Emery enkawl team hian Premier League-ah a tikimtu mai nih an tum lo.