Attacking football khel tur Spurs

Tottenham Hotspur-in an striker chhuanvawr Harry Kane an chân dawn a, hei vang hian goal nawr kawngah inthlahrun erawh an tum lo - player thar James Maddison chuan coach Ange Postecoglou duhdana attacking football an khelh tur thu a sawi.

Pound maktaduai 40-a Spurs zawmtu Maddison chuan, "Kan coach duhdan anga khelh hi player-te pawhin kan châk vek. Media lamah pawh kan hmu fo a, Spurs-in coach an neihte hian tlarhnung ven lam an ngai pawimawh hmasa zel.

"Coach ṭha tak tak chu an ni ngei a, mahse, tlarhnung lam an ngai pawimawh viau zel. Mahse, Ange chuan tlarhnung aiin goal khung a ngai pawimawh a, 'Hlauthawng suh u, kan chesual a nih pawhin mawh ka phur ang,' a ti hmiah mai.

"Player-ten hei hi an lawm a, ni tin kan training-ah pawh chutiang chuan khelh kan tum. Coach berin tlarhnung ringawt an ngaihtuah nghal hi chuan player tan a harsa ṭhin hle," tiin a sawi a, Spurs-in coach thar Postecoglou hnuaiah attacking football an khel dawn.

Spurs hian palyer langsar zingah Shakhtar Donetsk aṭangin Manor Solomon, Ajax aṭangin keeper Guglielmo Vicario, VfL Wolfsburg centre back Micky van de Ven leh Rosario Central forward Alejo Véliz te an la lut - Pathianni zan dar 6:30-ah Brentford nen an league match hmasa ber an khel ang.

Tottenham hian an pre-season match hnuhnung berah Barcelona chu 4-2 in an ngam lo a, a hma match hnihah Singapore Premier League club Lion City Sailors (5-1) leh Ukrainian club ṭha Shakhtar Donetsk (5-1) an hneh.