La Liga - Real leh Barcelona kan hmu leh dawn ta
Spanish football sawi chuan rilruah Real Madrid leh Barcelona an lo lang hmasa ber zel a, club lian pahnih avangin Spanish football pawhin ngaihven a hlawh ṭhin.
Khawvel huapa footballer langsarte pawhin La Liga lama iptepui ban an la châk reng a, a awih lo tan Paris St-Germain forward Kylian Mbappe zawh mai tur a ni!
Chutiang taka huhang leh boruak ngah La Liga chu nizan khan khelh ṭan a ni leh ta a, Real Madrid pawh zanin dar 1:00-ah Athletic Bilbao khelmuala lengin an inlan dawn.
Barcelona erawh Pathianni zan dar 1:00-ah an inlan dawn chauh a, Getafe chu khualmualah an lenchilh ang - Real leh Barca kianga leng Atletico Madrid chu Thawhṭanni zan lamah chauh an inlan dawn.
Beiseina
Real hian coach ropui bik Carlo Ancelotti hoin season bul an ṭan leh dawn. Mahse, Italian boss hian season hman zawh takah khan Copa del Rey nomawi a chawipui tih loh chu champion puina a nei lo.
Season zawh rualin Carlo hian a contract a hmang zo dawn a, Brazil a enkawl zui dawn. Hei vang hian Italian boss tan European football-a a season tawp ber pawh a ni thei a, nomawi nen mangṭha a duh dawn.
Chumi tur erawh chuan zanin aṭanga bul ṭan nghal a ṭul a, Saudi lamah Karim Benzema chân tawh mah se Rodrygo leh Vinicius Jr a la kawl avangin manganna tur a awm lo.
Hei chauh a ni lo - pound maktaduai 100 chuang man Jude Bellingham an la lut a, a thiamzia pre-season-ah hmuh turin a awm. Loan-a an hawh striker Joselu hi a kum tam deuh tawh mah se, season hmasa lawk khan Espanyol tan goal 17 a khung.
Keeper
Tun dinhmuna Real buaina langsar chu goalkeeper a ni a, keeper chhuanvawr Thibaut Courtois chuan a khupah hliam neiin, thla sarih aṭanga thla riat vel tal a chawlh a ngai dawn.
Real hian Belgian keeper awm loh hlana ding turin Andriy Lunin an nei a, mahse, Ukraine international chungah hian rinna pumhlum nghah an harsat avangin transfer bazar-ah keeper an melh mek.
Spanish media-ten an tarlan dan chuan Real hian Chelsea keeper Kepa Arrizabalaga an thlithlai a, ani bakah hian Manchester United nena inṭhen David de Gea hming pawh lam rik a ni.
He thu buatsaih a nih laia hming langsar ber erawh Sevilla keeper Yassine Bono a ni a, Saudi Arabia aṭanga sawmna a hmuh pawh Bono hian a be chhunzawm rih lo niin an sawi hial - Real tan keeper thar a hnai.
Barcelona
La Liga champion Barcelona sum dinhmun a la ṭha lo tih a chiang - chumi tifiahtu chu transfer bazar-a thawm an nei na lo hi a ni a, Catalan club-in tun nipuia an lakluh, thawm nei na ber chu İlkay Gündoğan a ni.
Manchester City captain hian free transfer-in Barca hi a zawm a, Athletic Bilbao centre back Iñigo Martínez chuan free transfer thoa zawmin, Girona aṭangin an academy chhuak Oriol Romeu chu €3.4mtd-in an la let bawk.
Barcelona hian hetihlai hian Sergio Busquets, Jordi Alba, Samuel Umtiti, Alex Collado, Nico Gonzalez leh Franck Kessie te an chân thung a, Xavi hman thiam Ousmane Dembélé chuan PSG a zawmsan dawn bawk.
A tawi zawnga sawi chuan Barca hi season thar hmachhawn turin an inpuahchah ṭha tawk lo. Chutihrual chuan he team hian Robert Lewandowski, Raphinha, Frenkie de Jong, Pedri, Gavi, Jules Koundé leh Marc-André ter Stegen te ho an la kawl a, Pathianni zana Getafe hneh tur khawpin an la ṭha tawk.La Liga - Real leh Barcelona kan hmu leh dawn ta