Zaninah German Supercup; Bayern Munich Vs RB Leipzig

Zanin dar 12:15 hian Bundesliga champion Bayern Munich leh DFB Pokal champion RB Leipzig ten DFL-Supercup an khel dawn. Inkhelhna tur hmun hi Bayern khelmual Allianz Arena a ni a, inkhel hi Sony Ten2-ah a en theih ang.

Germany-a football inelna sang ber Bundesliga chu August 18, Zirtawpni aṭangin khelh ṭan tur a ni a, chutihrualin tunkar tawp aṭangin league dang chu ṭan a ni tawh. DFL-Supercup khelh rual hian DFB Pokal first round chu khelh ṭan a ni bawk.

DFL-Supercup leh English football-a Community Shield te hi inang khat a ni a, nomawi lian thama chhiar ni lo mah se chak ngei an duh ṭhin.

German Cup-ah kum zawnin RB Leipzig an champion a, season liam ta pawh khan Supercup-ah Bayern leh Leipzig hi an inkhel tawh. Bavarians-in 5-3 in hnehna an chang.

Leipzig forward Timo Werner chuan, "Hlawhlinna kawngah hian duh tawk a awm lo a, kan duh belh zel. Season ṭha zawka ṭan kan duh a, Supercup kan lak theih chuan team boruak pawh a ṭhat lehzual phah ang," tiin a sawi.

Leipzig hian season liam taa an player pawimawh Christopher Nkunku leh Dominik Szoboszlai te an chân a; Benjamin Sesko, Lois Openda leh Xavi Simons te chu a thlak nana an lak a ni.

Bayern Munich hi season ṭan hmain an inla fel hman lo. Harry Kane an la la lut fel thei lo a, Yann Sommer-a'n Inter Milan a pan bakah Manuel Neuer-a'n ngai a awh loh avangin an zai ṭha leh. Bayern hian goalkeeper an la zawng mek. Chutihrualin zanin hi player thar Kim Min-jae, Konrad Laimer leh Raphael Guerreiro te tan bul ṭan hun a ni thei ang.