Ostapenko lakah Pliskova chak lo

French Open hmei-chhe singles boruak hriatthiam a har zel, champion tura rinkai zinga mi Karolina Pliskova chu second round lekah Jelena Ostapenko hneh loin a zinkawng a tawp.

Ningani zan khan Philippe-Chatrier Court-ah Pliskova a inlan a, rinkai zawk ni mah se darkar khat leh minute kua an inkhelh hnuah Ostapenko zawkin 6-4 ,6-2 in hnehna a chang a, Czech Republic star hian a service chu vawi nga ngawt a hloh.

Kum 2017 French Open champion Ostapenko chuan, "A tir lamah Pliskova khan a service nat em avangin a harsa hman hle, mahse inkhel ka thunun theih hnuah erawh kawng a awlsam phah," tiin hnehna a chan dan a sawi.

Latvian nula Osta-penko hi player ṭha zinga mi a ni a, mahse hliam a neih ngun bakah khelh fuh loh chang a ngah avangin beisei a phak lo. Clay court-ah erawh tun hma ang bawkin player hlauhawm leh tawhkhirh berte zinga mi a la ni phak.

Pliskova tan Ningani zan kha hun duhawm lo a ni. Pliskova-i phir unaunu Krystyna chu 2016 champion leh seeded 11-na ni bawk Garbine Muguruza lakah 6-3, 6-2 in a chak lo. Spain nula hian a match dawt lehah American Danielle a hmachhawn leh ang.

Inkhel dangah seeded pasarihna Petra Kvitova, Canadian tleirawl Leylah Fernandez leh seeded pariatna Aryna Sabalenka te chuan an khingpui ṭheuh an hneh bawk. Grand Slam vawi 23 champion tawh Serena Williams erawh hliam vangin a inkhel zui ve thei tawh lo a ni.